Александр Лукашенко Беларуснинг Испаниядаги элчиси Павел Пустовойни лавозимидан озод этди. Бу ҳақда Беларусь президентининг матбуот хизмати хабар берди.
Пустовой дипломатик мартабасидан, «лавозим мажбуриятларини нотўғри бажарганлиги» учун айрилган. Шунингдек, у Беларуснинг Жаҳон туристик ташкилотидаги доимий вакили лавозимидан ҳам бўшатилган.
17 август куни Павел Пустовой Беларусдаги вазиятни XXI асрдаги Европа давлати учун «номақбул» деб атаган эди. У президентлик сайловларидаги овозларни қайта санашга ва норозилик намойишлари вақтида йўл қўйилган зўравонликка алоқадорлар устидан очиқ суд ўтказишга чақирган.
Эслатиб ўтамиз, мамлакатдаги норозилик намойишларини биринчи бўлиб 16 август куни Беларуснинг Словакиядаги элчиси Игорь Лешеня қўллаб-қувватлаган. 24 август куни Лукашенко расман уни вазифасидан озод этган.
Шунингдек, Беларуснинг Ҳиндистондаги элчихонасининг учинчи котиби Андрей Мисюра ва ТИВнинг Шимолий Америка ва Ғарбий Европадаги департаменти раҳбари Андрей Бушило мухолифатни қўллаб-қувватлагани учун ишдан бўшатилган.
Изоҳ (0)