АҚШ мамлакатда пандемия туфайли юзага келган тушкунлик ва умидсизликка барҳам бериш учун 250 млн доллар сарфлашга қарор қилди

АҚШ Соғлиқни сақлаш ва ижтимоий хизматлар вазирлиги жамиятдаги коронавирус пандемияси сабабли юзага келган «тушкунликка қарши курашиш ва умид уйғотиш» мақсадида коммуникация компаниялари учун 250 миллион доллардан зиёд шартнома тузишга тайёрлигини билдирди. Бу ҳақда вазирлик ички ҳужжатларига таяниб Politico хабар берди.

Ҳужжатга кўра, ҳукумат пулнинг катта қисмини келаси йилнинг январига қадар сарфлашни режалаштирмоқда.

Politico’нинг ёзишича, аҳолидаги тушкунликка қарши курашиш ва умид уйғотишдан ташқари, шартноманинг мақсади янги шароитда бизнес юритушнинг энг яхши тажрибаси билан бўлишиш, америкаликларнинг ишга қайтиб, иқтисодиёт қайта тикланишини таъминлаш учун уларда ишончни кучайтиришдир.

«Администрация анъанавий ва рақамли оммавий ахборот воситалари, ижтимоий тармоқлар, спорт ва кўнгилочар индустрия, жамоат саломатлиги ассоциациялари ва бошқа шериклар имкониятидан фойдаланган ҳолда соғлиқни сақлаш ва иқтисодиёт борасидаги муҳим маълумотларни етказиб бериш орқали умидсизликка барҳам бериши, ишонч уйғотиб, миллий тикланишга эришиши мумкин», — дейилади ҳужжатда.

Шартнома шартларини бажариш бўйича ишларнинг асосий қисми жамоат хизматлари учун реклама эълонларини яратишдан иборат бўлиб, улар жамоатчиликни фаол равишда «соғлом хулқ-атворни ёки фуқароларнинг жавобгарлигини тарғиб қилишга» ишонтиришлари керак.

Нашрга ушбу масала билан таниш бўлган манбанинг маълум қилишича, 10-12 та компания ушбу шартномага қизиқиш билдирган, уларнинг аксарияти машҳур компаниялар эмас.

YouGov’нинг июнь ойида ўтказган сўровномага кўра, америкаликларнинг 34 фоизи ўз ҳаётларини 2020 йил охиригача пессимистик баҳолаган. Шу жумладан, 11 фоизи «жуда пессимистик» деган вариантни белгилаган. 54 фоизи эса келажакка у ёки бу даражада оптимистик руҳда боқмоқда. Сўровномада 18 мингдан ортиқ киши иштирок этган.

Эслатиб ўтамиз, АҚШ коронавирусга чалинганлар ва унда вафот этганлар сони бўйича дунёда биринчи ўринда. Сўнгги маълумотларга кўра, мамлакатда касаликка чалиниш бўйича 6 миллиондан ортиқ ҳолат аниқланган. Беморларнинг 183 минг нафардан ортиғи вафот этган.

Май ойи бошларида АҚШда ишсизлик даражаси АҚШда ишсизлик даражаси коронавирус пандемияси туфайли Буюк тушкунлик давридан бери энг ёмон натижани қайд этиб, 14,7 фоизга тушганди. Март ойида ишсизлик нафақасини олиш учун рекорд даражада кўп ариза берилган. Июнь ойида эса АҚШнинг Айдахо штати ҳукумати ишга қайтишга розилик берадиган ишсизларга қўшимча рағбатлантириш пули тўлашни бошлаган.