Трамп: «Президентлик сайловида Байден ғалаба қозонса, АҚШда инқилоб бўлади»

Агар АҚШда ноябрь ойида бўлиб ўтган президентлик сайловлари натижасида Демократик партиядан номзод Жо Байден ҳокимиятга келса, мамлакатда инқилоб бошланиши мумкин. Бу ҳақда амалдаги президент ва Республикачилар партиясидан номзод Дональд Трамп Fox News’га берган интервьюсига таяниб, РБК хабар қилди.

«Байден заиф одам. У қўғирчоқ каби бошқарилади. Бу (АҚШда) кескинликнинг пасайишига олиб келмайди, улар (радикал кучлар) шунчаки ғалаба қозониб, шаҳарларингизни ўз назоратига олади. Бу инқилоб бўлади», – деди президент.

Унинг фикрича, аксарият одамлар бундай сайлов натижаларини қўллаб-қувватламайди.

Трамп Байденни ким бошқаради деб ўйлайсиз, деган саволга президент аниқ одамларнинг исмини айтишдан бош тортди.

«Сиз ҳеч қачон эшитмаган одамлар, сояда қолиб кетадиган одамлар, кўчаларда норозилик намойишларини бошқарадиган одамлар», – деди Трамп.

Олдинроқ Fox News телеканалига берган яна бир интервьюсида Трамп Байден сайловда ғалаба қозонса, Хитой АҚШни эгаллаб олишини айтганди. Президент Хитой Байденга эгалик қилади деб ўйлайди ва шунинг учун унинг ютқазишини истаётганини маълум қилган.

Ўз навбатида Байден Трампни одамларда нафратни қўзғатишда ва Америка жамиятида зўравонликни рағбатлантиришда айблади.

«Агар президент Трамп жамиятимиздаги нафрат ва бўлиниш алангасини ёқишда давом этса ҳамда қўрқув сиёсатидан ўз тарафдорларини қўзғашда фойдаланса, нима бўлади деб ўйлайсиз? У ўйламасдан зўравонликни рағбатлантиради», – деди Байден.

Шунингдек, Байденнинг фикрича, Трамп ҳокимиятни бошқарган даврда жамиятдаги зиддиятлар кучайган ва бўлинишлар кўпайган.