Украина Чернобиль АЭСдаги портлашдан ҳам ортиқ бўлган янги экологик фалокатга дуч келиши мумкин. Бу ҳақда Донбасс бўйича уч томонлама алоқа гуруҳидаги Украина делегацияси раҳбари ўринбосари, Украинанинг биринчи бош вазири Витольд Фокин огоҳлантирган.
Унинг айтишича, Донбассдаги инфратузилманинг вайрон бўлиши кўплаб шахталарнинг «тақдир ҳукмига ташлаб қўйилиши»га сабаб бўлди сув тўплагичлар эса тўлиб кетган. Витольд Фокин зудлик билан уларни тозалаш бўйича ишларни ташкил этиш зарурлиги, акс ҳолда сув барча маҳаллий дарё ва кўлларни тўлдириши, кейин эса Азов ва Қора денгизга қуйилиши мумкинлигини таъкидлаган.
«Кўпчилик бунга кўз юммоқда, лекин яқинлашиб келаётган фалокат Чернобиль АЭСдаги авариядан ҳам каттароқ бўлиши мумкин. Ўйлаб ўтиришга вақт йўқ», — дея сўзларини якунлаган Фокин.
Маълумот учун, Чернобиль фожиаси 1986 йил 26 апрелда Украинанинг Киев шаҳрида, АЭС 4-блокида портлаш туфайли юз берган. Портлаш ишчилар тажриба олиб боришда хатога йўл қўйгани боис содир бўлган. Авария оқибатида 190 тонна радиоактив модда ташқарига чиққан. Расмий маълумотга кўра, 31-300 киши радиацияланган. 160 минг квадрат метр жой зарарланган. 400 минг одам кўчирилган.
Изоҳ (0)