Қашқадарёлик ҳокимлар велосипедда пойга уюштирди. Зоир Мирзаев ва Алишер Зокиров ғолиб бўлди (фото)

Қашқадарё вилоятида фаолият юритувчи ҳокимлар велосипедда пойга уюштирди. Манзилга вилоят ҳокими Зоир Мирзаев ҳамда Китоб тумани ҳокими Алишер Зокировлар биринчи бўлиб етиб келди.

Бу ҳақда «Дарё»га маълум қилган вилоят ҳокимлиги ахборот хизмати раҳбари Аҳрор Содиқовнинг айтишича, ҳокимлар «Автомобилсиз бир кун» лойиҳасида иштирок этиб, уч километрлик масофани босиб ўтган.

Таъкидлаш лозим, Ўзбекистон мустақиллигининг 29 йиллиги муносабати билан вилоятда кўплаб янгиликлар қилинди. Жумладан Деҳқонобод туманида лойиҳа қиймати 840 миллион сўм бўлган «Истеъмолчилар кутубхонаси» иш бошлади. Кутубхонада ичида кўзи ожизлар учун брайл ёзувидаги яна бир кутубхона ва тикувчилик цехи ҳам мавжуд бўлиб, умумий ҳисобда 20 дан ортиқ янги иш ўрни яратилган.

Шунингдек, туманда байрам арафасида лойиҳа қиймати 1 миллиард сўм бўлган ёшлар меҳнат гузари ҳам иш бошлаган бўлиб, унда 30 та янги иш ўрни яратган тикувчилик цехи, компьютер маркази ва мебель цехи фаолият бошлаган.

Мазкур объектлар очилишига бағишланган тадбирда иштирок этган вилоят ҳокими ўринбосари Илҳом Арзиқулов кутубхона ва ёшлар меҳнат гузари деҳқонободлик ёшлар учун байрамга муносиб совға бўлганини таъкидлаган.

«Бунда туман ҳокими Зоир Алиқулов бошчилигидаги масъулларнинг ҳиссаси беқиёс, бунинг учун вилоят ҳокимлиги номидан, қолаверса, деҳқонободликлар номидан туман раҳбариятига миннатдорлик билдирамиз», — деди вилоят ҳокими ўринбосари Илҳом Арзиқулов.

Эслатиб ўтамиз, аввалроқ вилоятга Хитойдан 30 та Golden Dragon русумли замонавий автобус олиб келингани ва йўловчиларга хизмат кўрсатишни бошлагани, автобусларнинг дастлабки йўловчилари вилоят ҳокими бошчилигидаги раҳбарлар ва фаоллар эканлиги хабар берилганди.