Ўзбекистонда сентябрда, айниқса биринчи ўн беш кунликда об-ҳаво иссиқ ва кам булутли бўлади. Қисқа муддатли ёмғирлар фақат айрим кунларда кўпроқ тоғли ва тоғолди ҳудудларда кузатилиши мумкин. Бу ҳақда «Ўзгидромет» матбуот хизмати хабар берган.
Сентябрь ойида об-ҳаво кўп йиллик ўртача кўрсаткичларга яқин бўлади. Тунги ҳарорат 15—20 даража атрофида бўлади, кундузи 32—37 даражадан 25—30 даража иссиққача ўзгариб туради.
31 августда Волгабўйи ҳудудидан нисбатан нам ва салқин ҳаво оқими кириши натижасида об-ҳаво ўзгаради. Республика бўйича ҳаво булутли бўлиши, лекин ёғингарчиликлар бўлмаслиги кутилмоқда. Тошкент вилоятининг айрим жойларида қисқа муддатли ёмғир ёғиши, момақалдироқ бўлиши мумкин. Кундузи ҳарорат 1—2 даражага пасайиб, 28—33 даража атрофида бўлади.
Сентябрнинг илк кунларида ёғингарчилик кузатилмайди. Ҳаво ҳарорат кечаси 15—20, кундузи 30—35 даража атрофида бўлади.
Ўзбекистоннинг тоғли ва тоғолди туманларида 30—31 август ва 1—2 сентябрь кунлари қисқа муддатли ёмғир ёғиши, момақалдироқ бўлиши мумкин.
Изоҳ (0)