Ўзбекистондаги давлат ОТМлари ректорлари ўзлари раҳбарлик қилаётган олий ўқув юртига ҳужжат топширган абитуриентларга SMS хабарномалар юбормоқда. Бу ҳақда Олий ва ўрта махсус таълим вазирлиги хабар берган.
Хабарга кўра, ОТМ вакиллари тест синовларини ташкил этиш ва ўтказиш жараёнларида бевосита иштирок этмайди, аммо ректорлар номидан улар раҳбарлик қилаётган ОТМни танлаган абитуриентларга SMS орқали мурожаат қилиниб, талаба бўлиш истагидаги одамлар билан мулоқот йўлга қўйилмоқда.
«Абитуриент рўйхатдан ўтишда кўрсатган телефон рақамига SMS-хабарнома жўнатилиб, ректор мурожаатининг манзилига ҳавола кўрсатилади. Эътиборли жиҳати, абитуриент электрон манзилга кириб, ўзининг паспорт серияси ва рақами ёки рўйхатдан ўтишда қайд этилган телефон рақамини киритса, ректорнинг шахсан абитуриент номига йўлланган мурожаати очилади.
Мурожаатда имтиҳонлар бошланиш куни, ўзи топширган йўналишга рўйхатдан ўтган талабалар сони, абитуриент рухсатномасини олиш бўйича кўрсатма, университетга тааллуқли қабул янгиликларини олиш мумкин бўлган интернет манзиллари ҳамда саволлар туғилганда мурожаат қилиш мумкин бўлган телефон рақамлари ва бот манзиллари киритилган», — дейилади вазирлик хабарида.
«57 399 нафар абитуриентнинг телефон рақамларига SMS-хабарнома орқали мурожаатимни ўқиш мумкин бўлган ҳаволани юбордик. Бундан ташқари интернет сифати паст бўлган ҳудудлар аниқланиб, шу ҳудудда яшовчи абитуриентларга телефон орқали керакли маълумотлар бериб борамиз. Умуман олганда, биронта ҳам абитуриент ушбу маълумотлардан бехабар қолиб кетмаслигини таъминлаймиз», — деган Андижон давлат университети ректори Акрамжон Йўлдошев.
Аввалроқ Ўзбекистонда ОТМларга кириш имтиҳонлари ўтказиладиган стадион ва хиёбонлар рўйхати эълон қилинганди.
Олий ўқув юртларига кириш тест синовлари 2 сентябрдан бошланиб, 14 кун давом этади, бакалавр босқичининг 1, 2, 3, 4-босқич талабаларига ҳозирча сентябрь ойидан бошлаб масофавий таълим бошланади.
Республика таълим муассасаларига ўқишга қабул қилиш бўйича Давлат комиссиясининг қарорига мувофиқ, тест синовлари билан бир қаторда касбий (ижодий) имтиҳонлар ўтказиладиган бакалавриат таълим йўналишлари бўйича касбий (ижодий) имтиҳонлар аввалги йилларда олинган мос фан бўйича тест синовлари билан алмаштирилган.
Аввал абитуриентларга ҳар 30 та тест топшириғини ечиш учун (жавоблар варақасини тўлдириш билан бирга) 90 дақиқа (60 та тест топшириғига жами 180 дақиқа берилади) вақт ажратилади.
Изоҳ (0)