Қарши шаҳрига Хитойдан келтирилган 30 та Golden Dragon русумли замонавий автобус йўловчи ташишни бошлади. Автобусларнинг биринчи йўловчилари вилоят раҳбарлари ва фаоллар бўлди, дея хабар берди «Дарё» мухбири.
Таъкидланишича, 30 август, якшанба куни вилоят ҳокими Зоир Мирзаев ва вилоят фаоллари Қарши шаҳридаги «Хўжаи Жарроҳ» зиёратгоҳида жам бўлиб, қурбонлик қилинган. Сўнгра Қуръон тиловат қилиниб, йўловчи ташиш учун келтирилган автобуслар биринчи йўловчиларини манзилига етказган.
Хитойдан келтирилган замонавий автобусларга чиққан вилоят раҳбарияти ва фаоллари дастлаб Қарши шаҳридаги Шуҳрат қўрғонида бўлиб, қатағон қурбонларини ёд этган.
Шундан сўнг йўловчилар Алишер Навоий боғидаги Нуронийлар масканида бўлиб, вилоят кексалари учун яратилган шарт-шароитни кўздан кечирган.
«Вилоят ҳамда Қарши шаҳар ҳокимлиги масъуллари ҳамроҳлигидаги вилоят фаоллари Ўзбекистон мустақиллигининг 29 йиллиги олдидан очилган объектларда ҳам бўлиб, байрам муносабати билан шаҳарда қилинган ўзгаришларни ўз кўзи билан кўрди», — дейди вилоят ҳокимлиги ахборот хизмати раҳбари Аҳрор Содиқов.
Вилоят транспорт бошқармаси ахборот хизмати раҳбари Мирзоҳид Жўраевнинг қўшимча қилишича, «Халқ банки»нинг Қашқадарё вилоят филиали томонидан «Cargill Financial Services International lnk» компаниясидан жалб қилинган кредит маблағлари ҳисобига келтирилган 30 та Golden Dragon автобуси «Шарофиддин Нурилло» МЧЖ масъуллари томонидан олиб келинган бўлиб, мазкур автобуслар 1-йўналишда — Қарши темир йўл вокзали—Ерқўрғон бозори йўналиши бўйича фаолият юритади
Изоҳ (0)