Жаҳон соғлиқни сақлаш ташкилоти Қозоғистонни COVID-19 коронавирус инфекциясига қарши ишлаб чиқилаётган вакцинанинг клиник синовларига рухсат берилган давлатлар рўйхатига киритди. Рўйхатдан ҳаммаси бўлиб 19 та давлатда ишлаб чиқилаётган 33 та вакцина жой олган.
Вакцинани яратиш устида иш олиб борилаётган давлатлар ичида Буюк Британия, Хитой, Россия, АҚШ, Германия, Япония, Ҳиндистон, Жанубий Корея, Бельгия, Швеция, Сингапур, Италия, Австралия, Тайван, Куба, Франция, Австрия ва Канада мавжуд.
Қозоғистоннинг фаолсизлаштирилган вирусли вакцинаси клиник синовларнинг биринчи ва иккинчи босқичларидан ўтмоқда.
Вакцина Қозоғистон Таълим ва фан вазирлиги фан қўмитасининг Биологик хавфсизлик муаммолари илмий-тадқиқот институти томонидан ишлаб чиқилмоқда.
Маълумотларга кўра, ҳозирда дунёда коронавирусга қарши 170-218 та вакцина ишлаб чиқилмоқда. ЖССТ бу вакциналар ичида AstraZeneca компанияси ва Оксфорд университети томонидан ишлаб чиқилаётганларини энг истиқболли деб эътироф қилган.
Эслатиб ўтамиз, 11 августда коронавирусга қарши дунёдаги биринчи вакцина рўйхатдан ўтказилган. Россиянинг Н.Гамалея номидаги илмий маркази ишлаб чиққан ушбу вакцина клиник синовлари якунланмасдан рўйхатдан ўтказилганди. ЖССТ расмийлари вакцинанинг бундай тартибда, жуда тез рўйхатдан ўтказилишига шубҳа билан қараган ва уни дунёнинг бошқа мамлакатларига тавсия қилиш учун у ҳақида кўпроқ маълумот олиш кераклигини қайд этган.
Аввал Россия ва Қозоғистон ўртасида «Спутник V» вакцинасини етказиб бериш тўғрисида битим имзолангани, Россияда грипп ва коронавирусга қарши ягона вакцина яратилаётгани, «Роспотребнадзор»нинг «Вектор» давлат илмий маркази томонидан ишлаб чиқилган коронавирус инфекциясига қарши иккинчи вакцинанинг клиник синовлари иккинчи босқичи якунига етказилиши билан гувоҳномага эга бўлиши мумкинлиги ҳақида хабарлар берилганди.
Изоҳ (0)