Коронавирусдан вафот этганларни гўрковга бериш ва кўмиш тартиби мавжуд. Бу ҳақда Коронавирусга қарши кураш штаби аъзоси Барно Абдусаматова «Шифобахш» Telegram каналига маълум қилди.
Барно Абдусаматованинг таъкидлашича, коронавирусдан эмас, бошқа сабаблар билан вафот этганларни дафн этишда гўрков ва маййитни қўювчи – вафот этган шахснинг яқини махсус кийим (скафандр)да бўлиши талаб этилмайди.
«Коронавирус билан касалланиб, вафот этган шахсларни гўрковга бериш ва кўмиш маросимларини ўтказиш тартиби ишлаб чиқилган. Лекин бошқа касалликлар ёки бошқа сабаблар билан вафот этган фуқароларни дафн этиш бўйича ҳеч қандай талаб йўқ», – деди мутахассис.
Аввалроқ Ўзбекистонда пандемия шароитида дафн маросимини ўтказиш қоидалари маълум қилинган эди. Унга кўра дафн маросимларида кўпчилик йиғилмаслиги лозим. Дафнга келганлар ижтимоий масофа – 1,5 метр оралиқни сақлашлари, тиббий ниқоб ва қўлқоп тақишлари, антисептик воситалар билан қўлларини тозалаб туришлари керак. Ўзаро кўришишни вақтинча тарк этиш муҳим.
Маййит тиббий хавфсизлик чоралари кўрилган ҳолда ювилиши лозим. Яъни ғассол ниқоб ва қўлқопда бўлиши керак. Ғуслда ишлатилган барча нарсалар ёқиб юборилиши, челак ва бошқа асбоблар хлор каби воситалар билан дезинфекция қилиниши ҳамда 5-6 соатга қуёш остида қуритилиши керак.
Агар маййит тиббий ходимлар томонидан махсус матолар билан ўраб қўйилган бўлса, уларни тиббий хавфсизлик нуқтаи назаридан очиш мумкин эмас. Бунда маййитни қайта ғусл қилиш шарт бўлмайди.
Мавзуга доир:
- Йўлак бўйлаб мурдалар ётган шифохона Ўзбекистонда эканлиги тасдиқланди. Аммо улар коронавирусдан вафот этгани рад этилди
- Фотожамланма: Дунё мамлакатларида коронавирус қурбонлари қандай дафн этилмоқда?
- «Индамай олиб бориб, кўмиб келиш бошландими?». Сирдарёдаги шубҳали дафн маросими видеосига аниқлик киритилди
Изоҳ (0)