Koronavirusdan vafot etganlarni go‘rkovga berish va ko‘mish tartibi mavjud. Bu haqda Koronavirusga qarshi kurash shtabi a’zosi Barno Abdusamatova “Shifobaxsh” Telegram kanaliga ma’lum qildi.
Barno Abdusamatovaning ta’kidlashicha, koronavirusdan emas, boshqa sabablar bilan vafot etganlarni dafn etishda go‘rkov va mayyitni qo‘yuvchi – vafot etgan shaxsning yaqini maxsus kiyim (skafandr)da bo‘lishi talab etilmaydi.
“Koronavirus bilan kasallanib, vafot etgan shaxslarni go‘rkovga berish va ko‘mish marosimlarini o‘tkazish tartibi ishlab chiqilgan. Lekin boshqa kasalliklar yoki boshqa sabablar bilan vafot etgan fuqarolarni dafn etish bo‘yicha hech qanday talab yo‘q”, – dedi mutaxassis.
Avvalroq O‘zbekistonda pandemiya sharoitida dafn marosimini o‘tkazish qoidalari ma’lum qilingan edi. Unga ko‘ra dafn marosimlarida ko‘pchilik yig‘ilmasligi lozim. Dafnga kelganlar ijtimoiy masofa – 1,5 metr oraliqni saqlashlari, tibbiy niqob va qo‘lqop taqishlari, antiseptik vositalar bilan qo‘llarini tozalab turishlari kerak. O‘zaro ko‘rishishni vaqtincha tark etish muhim.
Mayyit tibbiy xavfsizlik choralari ko‘rilgan holda yuvilishi lozim. Ya’ni g‘assol niqob va qo‘lqopda bo‘lishi kerak. G‘uslda ishlatilgan barcha narsalar yoqib yuborilishi, chelak va boshqa asboblar xlor kabi vositalar bilan dezinfeksiya qilinishi hamda 5-6 soatga quyosh ostida quritilishi kerak.
Agar mayyit tibbiy xodimlar tomonidan maxsus matolar bilan o‘rab qo‘yilgan bo‘lsa, ularni tibbiy xavfsizlik nuqtayi nazaridan ochish mumkin emas. Bunda mayyitni qayta g‘usl qilish shart bo‘lmaydi.
Mavzuga doir:
- Yo‘lak bo‘ylab murdalar yotgan shifoxona O‘zbekistonda ekanligi tasdiqlandi. Ammo ular koronavirusdan vafot etgani rad etildi
- Fotojamlanma: Dunyo mamlakatlarida koronavirus qurbonlari qanday dafn etilmoqda?
- “Indamay olib borib, ko‘mib kelish boshlandimi?”. Sirdaryodagi shubhali dafn marosimi videosiga aniqlik kiritildi
Izoh (0)