Аввал хабар берилганидек, 29 август куни Ўзбекистон Президенти Шавкат Мирзиёев ерусти ҳалқа метросининг биринчи босқичининг ишга тушиш жараёни билан танишиш учун ташриф буюриб, жамоатчилик вакиллари билан бирга поездда юрган эди.
30 август куни ерусти метросининг «Дўстлик-2» бекатидан «Қўйлиқ» бекатигача бўлган йўналиши илк йўловчиларни қабул қилди. «Дарё» мухбири ҳам оммавий ахборот воситалари ходимлари учун ташкил этилган пресс-тур доирасида ушбу янги маскан фаолияти билан танишди.
Янги ерусти метросининг мавжуд «Дўстлик» бекати билан боғланиши йўловчилар ҳеч қандай тўловларсиз алмашишади. Яъни мавжуд метро бекатларидан келгандан сўнг ҳеч қандай тўсиқ ва турникетларсиз янги метро вагонларига ўтиб олишади. Россиядан 5 та таркиб вагони олиб келинган бўлиб, уларнинг 4 таси (4 та вагондан иборат) 12 дақиқа оралиғи билан ҳаракатга қўйилган. Битта таркиб доимий равишда захира вазифасини бажаради. Чунки техник тарафдан таркибларимиз 100 километр масофани ўтиб бўлганидан сўнг кўрикдан ўтаётганда захирадаги таркиб ишга чиқади. Вагонлар биринчи кун ҳаракатланаётгани сабабли йўлларимиз синовдан ўтганидан кейин вақтни янада қисқартириб, қўшимча вагонлар қўшишни режа қилганмиз. Жами масофа 11,5 километр бўлиб, 2 та йўлдан ҳаракатланади.Бекатлар ўзига хос дизайнда қурилган. Йўловчиларга қулайлик яратувчи замонавий технологиялар, йўл ҳақини электрон тўлаш имконини берувчи турникетлар, эскалатор билан жиҳозланган.Ҳаракат хавфсизлиги таъминланган, темир-бетон конструкциялардан қилинган лойиҳа зилзилабардошли, лойиҳалаш институтлари томонидан Тошкент шаҳрининг сейсмик кўрсаткичларидан келиб чиқиб 9 балли зилзилага мослаб тайёрланган, Қурилиш вазирлиги қошидаги экспертизадан ўтган. Рельслар орасига контрбурчаклар қўйилган. Машинистлар ҳар бир бекатда ўрнатилган тезликда юради. Биринчи босқичда 300 дан ортиқ иш ўрни яратилган бўлиб, ушбу йўналиш кунига 40 минг йўловчига хизмат кўрсатиш имкониятига эга.
Азизбек Абдиев, «Ўзбекистон темир йўллари» акциядорлик жамияти капитал қурилиш дирекцияси бошлиғи ўринбосари
Ерусти ҳалқа метроси лойиҳасининг умумий қиймати 422 миллион доллардан зиёд бўлиб, бешта босқичда амалга оширилиши режалаштирилган. Кейинги, яъни иккинчи босқичда Қўйлиқ бозори билан Тошкент ерости метросининг «Олмазор» бекати боғланади. Учинчи бўлиб «Беруний», ундан кейин «Бодомзор» бекатигача бўлган қисм қурилади. Сўнгги босқичда эса ҳалқа метро линияси яна «Дўстлик» бекатига уланади. Бу йўлларнинг жами узунлиги қарийб 55 километр, бекатлар сони 35 та бўлади.
Изоҳ (0)