Тошкент метрополитенининг Юнусобод йўналишидаги янги «Юнусобод» ва «Туркистон» бекатлари ишга тушиши билан янги 124 та иш ўрни яратилган. Бу ҳақда метрополитеннинг қурилиш бўйича муовини Сойиб Туробов оммавий ахборот воситалари учун ташкил этилган пресс-тур давомида маълум қилган.
Лойиҳада қарийб 3 километр метро йўли ҳамда «Юнусобод» ва «Туркистон» бекатлари барпо этилган бўлиб, у «Шаҳристон» бекатига уланган. Метро бекатлари Ўзбекистонда ишлаб чиқарилган хом ашё асосида безатилган. Туннелнинг ёпиқ қисмида Германиядан келтирилган янги бурғулаш технологияси қўлланилган. Эски технологияларимиз очиқ усулда ишлаган. Айни пайтдаги янги технология ёпиқ усулда, ер остида тепа қисми очилмаган ҳолда ишлайди.2001 йилда қурилиши бошланиб тўхтатилган лойиҳа 1990 йилларда «Мингўрик», «Бодомзор», «Шаҳристон» бекатлари қурилгач, 200 метр масофадан сўнг ерусти сувлари баланд бўлгани сабабли эски технологияларнинг кучи етмаслиги натижасида қурилиш тўхтатилган. Бироқ метро йўналишининг иккинчи босқичи қурилиши Президент Шавкат Мирзиёевнинг 2016 йил 7 ноябрдаги қарорига мувофиқ 2017 йилнинг январь ойида бошланган эди. Германиядан харид қилинган янги ускуна ерости сувларига бардошли саналиб, сувли жойдан темир-бетон тюбинг қўйиш орқали ўтилган.«Бетонлар Ўзбекистоннинг ўзида махсус ташкилотда қуйилади, бу ерга олиб келинади»,— дейди Тошкент шаҳар ҳокими ўринбосари Даврон Ҳидоятов.Сойиб Туробов, «Тошкент метрополитени» унитар корхонаси қурилиш бўйича муовини.
Таъкидланишича, ерости биносининг 1 километр қисмига қўшимча маблағлар билан қўшиб ҳисоблаганда жами 25 миллиард сўм сарфланган. «Юнусобод» бекати «Туркистон» бекатига нисбатан қурилиши ва безак бериш учун ишлатилган материаллар ранги, кўриниши ҳамда дизайни бўйича бироз фарқ қилади. Икки бекат кўриниши ва фасади бир-бирини такрорламайди. «Юнусобод» бекатининг ички қисми ҳамда 100 метрли перрон ўзига хос қия шаклида бунёд этилган. Перрон ўртасида бир қаторли нақшинкор устунлар бунёд этилган.
Бекатларнинг ҳар бир ҳудуди тўлиқ кузатув ва хавфсизлик камералари, кондиционерлар, ҳаво вентиляторлари ва товуш чиқарувчи техникалар билан жиҳозланган. Бекатларга кириш ва чиқиш ҳудудларида йўналиш белгилари ўрнатилган.
Имконияти чекланган, кўзи ожиз йўловчилар учун бекатлар платформасида махсус бўртиб чиққан тактил плиткалар ётқизилган. Шунингдек, бекатларга тушиш ва чиқиш зиналарида ногиронлар аравачаси билан кириб-чиқишда фойдаланиладиган замонавий қияли электромобил аравачалар ўрнатилган.
Бир кунда «Юнусобод» бекатида қўшимча 5 минг йўловчига, «Туркистон» бекатида эса 2,5 минг йўловчига хизмат кўрсатиш режалаштирилган.
Эслатиб ўтамиз, 29 август куни Шавкат Мирзиёев давлат ва жамоат ташкилотлари вакиллари, меҳнат фахрийлари ҳамроҳлигида Тошкент шаҳридаги бунёдкорлик билан танишиш доирасида биринчи бўлиб айнан Тошкент метрополитенининг Юнусобод йўналишига ташриф буюрган эди. Аввалроқ Тошкент ҳалқа метро линиясининг биринчи босқичи бўлган Дўстлик—Қўйлиқ метро линияси қуриб битказилгани ҳақида хабар берилганди. Эслатиб ўтамиз, «Юнусобод» йўлининг иккинчи босқичи ҳамда ерусти ҳалқа метро йўлининг биринчи босқичини 2020 йил мартида фойдаланишга топшириш режалаштирилганди.
Изоҳ (0)