Google ва Facebook АҚШ ҳамда Гонконг ўртасида денгиз ости интернет кабелини (Pacific Light Cable Network, PLCN) ётқизиш режасидан воз кечди, дея хабар бермоқда Meduza Bloomberg нашрига таяниб.
Компаниялар АҚШ Федерал алоқа комиссиясидан (АФАК) ўз аризаларини қайтариб олди ва янгисини тақдим этди. Янги аризаларга кўра, энди сув ости кабеллари Тайван ва Филиппин билан алоқаларни таъминлайди.
Таъкидланишича, АҚШ разведка хизмати ва АҚШ Адлия вазирлиги июнь ойида АФАКдан компанияларнинг биринчи аризаларини рад этишни сўраган. Чунки Гонконг билан алоқа канали Хитойга америкаликларнинг шахсий маълумотларини олиш имкониятини беради. Махфий хизматларнинг маълумотларига кўра, Гонконгнинг Pacific Light Data компанияси Хитой разведкасига тегишли ҳисобланади.
АФАК комиссари Жеффри Старкс ушбу фикрга қўшилишини айтди. Унинг сўзларига кўра, комиссия маълумотлар хавфсиз ва ҳимояланган бўлишини таъминлаши керак.
Alphabet вакили (Google компаниясининг бош компанияси) Bloomberg’га компания «тасдиқланган каналлар орқали» ишлашни давом эттираётганини айтган. Facebook вакили эса журналистик сўровини АФАКга йўналтирган.
Financial Times нашри июнь ойида Google PLCN лойиҳасида Сингапурни Гонконгга альтернатив сифатида кўриб чиқаётгани ҳақида хабар берган.
Financial Times маълумотларига кўра, PLCN лойиҳаси 300 миллион долларга баҳоланмоқда. Кабель АҚШ ва Хитой ўртасида маълумот узатишни сезиларли даражада тезлаштириш учун хизмат қилади.
Изоҳ (0)