Avstraliya poytaxti Kanberra shahrida koronavirusga qarshi vaksinaning klinik sinovlari boshlandi. Vaksina AQShning Novavax kompaniyasi tomonidan ishlab chiqilgan. Bu haqda “Korrespondent.net” xabar berdi.
Sinovlarda ishtirok etadigan dastlabki qatnashchilar Kanberradagi oliy o‘quv yurtlarining xodimlari va talabalari hisoblanadi.
“Vaksinani qabul qilgan sinov guruhi — kanberralik ko‘ngillilar. Hududda deyarli ikki oydan buyon koronavirus bilan kasallanish bo‘yicha birorta ham yangi holat qayd etilmagani sababli mazkur shahar tanlangan. Ular preparatni qabul qilganidan buyon ko‘p vaqt o‘tmadi, biroq hozircha biz hech qanday salbiy ta’sirlarni ko‘rmayapmiz”, — deya ma’lum qilgan tadqiqot markazi vakili Mett Kleysi.
Mutaxassislarning qayd etishicha, preparatni qabul qilganlardan hech kim sog‘lig‘i yuzasidan shikoyat qilmagan bo‘lsa ham, vaksinani ishchi deb hisoblashga vaqtli. Sinovlarning birinchi bosqichida shifokorlar vaksina xavfsiz ekanligiga ishonch hosil qilishi kerak.
“Sinalayotgan vaksina ikki qismdan tashkil topgan, ulardan biri virus genetik materialining kichik qismi hisoblanadi. Shu sababli emlanganda organizm virusni emas, balki uning izini qabul qiladi. U esa xavf manbayini tanishga va unga immunitet javobini tayyorlashga imkon beradi. Vaksinaning ikkinchi qismi bu javobni kuchaytiruvchi preparat hisoblanadi”, — deya tushuntirish bergan Kleysi.
Mutaxassisning bildirishicha, hozircha preparatni 49 nafar ko‘ngilli qabul qilgan, qolganlar esa tajribada ishtirok etishdan oldingi yakuniy tibbiy ko‘rikdan o‘tmoqda. Birinchi emlashdan keyin olti oy o‘tgach ikkinchi emlash amalga oshiriladi. Keyin esa shifokorlar koronavirusga qarshi immunitet hosil bo‘lishi va uning barqarorligini kuzatishi uchun ko‘ngillilar har olti oyda tahlil topshiradi. Sinovlarning oraliq natijalari 2020-yilning oxirida ma’lum bo‘ladi.
Avvalroq Qozog‘iston hukumati COVID-19’ga qarshi vaksinaning klinik sinovlariga ruxsat bergani haqida xabar qilingandi.
Rossiya prezidenti Vladimir Putin koronavirusga qarshi yaratilgan birinchi vaksina “Sputnik V”ni olgan qizi o‘zini yaxshi his qilayotganini ma’lum qilgandi.
Shuningdek, “Rospotrebnadzor”ning “Vektor” davlat ilmiy markazi tomonidan ishlab chiqilgan koronavirus infeksiyasiga qarshi ikkinchi vaksinaning klinik sinovlari ikkinchi bosqichi yakuniga yetkazilishi bilan guvohnomaga ega bo‘lishi mumkinligi xabar qilindi.
Izoh (0)