Самарқанд вилоятининг Тойлоқ туманида икки юздан ортиқ ўзига тўқ оилалар кам таъминланганлар рўйхатига киритилган. Шунингдек, Ургут туманининг Катта Санчиқул қишлоғида эса бир миллион сўмдан берилиши лозим бўлган моддий ёрдам пулининг 100 минг сўмини маҳалла раиси ушлаб қолган. Бу ҳақда Олий Мажлис Қонунчилик палатаси депутатлари Наврўз Ризаев ва Ғайрат Абдиев маълум қилди, деб хабар берди «Дарё» мухбири.
Олий Мажлис Қонунчилик палатаси депутатлари президент Шавкат Мирзиёев раҳбарлигида 2020 йил 20 август куни ўтказилган видеоселектор йиғилишида берилган топшириққа кўра, шаҳар ва туман сессияларида иштирок этиб, ҳокимлар аҳолининг эҳтиёжманд қатламини қай даражада қўллаб-қувватлашини ўрганган.
«Самарқанд вилоятининг туманларида ўтказилаётган сессияларда аҳолининг ижтимоий қатламини рўйхатда олиш ва кам таъминланган оилаларга берилаётган пуллардан ушлаб қолиш ҳолатлари аниқланган, — деди Олий Мажлис Қонунчилик палатаси депутати Наврўз Ризаев. — Масалан, Тойлоқ туманидаги секторлар фаолияти ўрганиб чиқилганда, икки юздан ортиқ моддий ва молиявий аҳволи яхши оилалар маҳалла томонидан кам таъминланганлар рўйхатига киритилгани маълум бўлган. Афсуски, бундай ҳолат вилоятнинг бошқа туманларида ҳам бор».
Депутатларнинг таъкидлашича, бу борада ижобий ишлар ҳам қилинмоқда. Аммо асосий эътирозлар маҳалла, маҳалла котиблари ва ўша маҳалла бўғинидаги мутасаддиларнинг масъулиятсизлиги сабаб келиб чиқмоқда.
«Президентимиз ўтказган йиғилишдан сўнг сектор раҳбарлари бундай ҳолатларга жиддий муносабат билдирмоқда. Биз умид қиламизки, улар аниқланган ноқонуний ҳаракатларнинг охирига етади. Ўз навбатида бизлар ҳам ўз таклифларимизни киритдик, — деди Олий Мажлис Қонунчилик палатаси депутати Ғайрат Абдиев. — Аниқланган камчиликлардан сўнг рўйхат қайта шакллантирилиб, бўшаб қолган жойларга ҳақиқий муҳтож оилалар киритилмоқда».
Қўшимча қилинишича, айрим жойлардаги маҳалла раисларининг фермер хўжалиги ҳам бор бўлиб, улар ишчиларига ойлик сўрамаслик шарти билан эҳтиёжманд аҳолига берилиши лозим бўлган ёрдам пулларини уларга бериб юборган.
«Ургут туманининг Катта Санчиқул қишлоғида кам таъминланган оилаларга берилган бир миллион сўм пулнинг юз минг сўмини маҳалла раиси ушлаб қолган. Бизнинг боришимизни эшитган раис одамларга яна юз минг сўмдан тарқатиб, шикоят қилмаслигини айтган», — деди Олий Мажлис Қонунчилик палатаси депутати Наврўз Ризаев.
Олий Мажлис депутати Ғайрат Абдиев виждонсизликка йўл қўйган маҳалла раисларига қаттиқ чора кўрилиши ҳақидаги таклиф сессия қарорига ҳам киритилиши тарафдори эканлигини қўшимча қилди.
«Албатта, ҳуқуқни муҳофаза қилувчи органлар ишлаяпти. Аммо кенгаш қарорларига киритилса, назорат яна кучайтирилади. Бу орқали биз қарорнинг мана шу қисми нимага бажарилмади, деган саволни ўртага қўя оламиз. Мен маҳаллий кенгаш депутатларининг ҳаммасини фаолликка ва ҳамкорликка чақираман. Чунки бундай ҳолатга кўз юмиб бўлмайди. Сессияларда депутатларнинг фаоллиги ошган. Аммо барибир ҳали таҳлилга киришилган эмас. Биз буни тўхтатмаймиз. Бу масала мунтазам равишда муҳокама қилинади ва мувофиқлаштирилади. Сабаби аввал қилинган хатони қайтармаслик керак. Ахир халқни алдаб бўлмайди», — деди Ғайрат Абдиев.
Изоҳ (0)