Наманган вилоятида 2019 йил март ойида 36 ёшли Н.А.дан 10 минг дона транспорт воситаси ғилофини олиб, унга 200 минг АҚШ доллари беришни ваъда қилиб, сотувдан тушган пулларни ўз эҳтиёжларига сарфлаб юборган И.М.га нисбатан жиноят иши қўзғатилди. Бу ҳақда Тергов департаменти хабар қилди.
Хабарга кўра, 25 ёшли И.М. ўзганинг мулкини фирибгарлик йўли билан қўлга киритиш мақсадида 2019 йилнинг 22 март куни Наманган шаҳрида Н.А.нинг жами 10 минг дона транспорт воситаси устига осма ғилофларига харидор топганини айтган. I.М. жиҳозларни сотиб, пулини 10-15 кунда беришни ваъда қилиб, ҳар бир осма ғилофларни 20 АҚШ долларидан пуллашга келишган.
У 200 минг АҚШ долларига тенг бўлган осма «чехол»ларни олиб кетиб, уларни сотиб юборган. Пулларни ўзининг эҳтиёжлари учун сарфлаган.
Мазкур ҳолат юзасидан Наманган шаҳри бўйича ИИО ФМБ ҳузуридаги Тергов бўлими томонидан И.М.га нисбатан Жиноят кодексининг 168-моддаси 4-қисми «а» банди (фирибгарлик) билан жиноят иши қўзғатилган. Дастлабки тергов ҳаракатлари олиб борилмоқда.
Аввал Наманганда ҳокимлик мансабдори номини сотиб, ер майдонини расмийлаштириб бериш учун 10 минг доллар талаб қилган шахс қўлга олингани, Каттақўрғонда фуқарони Миллий гвардия институтига киритиб қўйиш эвазига 8000 доллар сўраган шахс қўлга тушгани, Тошкент вилоятидаги 12 млрд сўмлик таъмирлаш ишларини олиб бериш учун тадбиркордан 60 минг доллар талаб қилган фуқаро ушлангаи ҳақида хабарлар берилган.
Изоҳ (0)