«Ўзбекистон темир йўллари» Россиядан яна учта янги электровоз олиб келди, деб хабар бермоқда компания матбуот хизмати.
18 июль куни Тошкент Марказий вокзалига «Eрмак» типидаги иккита янги уч сексияли электровоз олиб келинган, йил якунига қадар яна шундай электровозларнинг учтаси келтирилиши режалаштирилган эди. 28 август куни ушбу вокзалга навбатдаги уч сексияли 3ЭС5К серияли 3 та янги «Eрмак» электровози олиб келинди.
«Бугунги кунда ‘Ўзбекистон темир йўллари’ акциядорлик жамияти тасарруфидаги пўлат изларнинг умумий узунлиги 7 минг 500 километрдан ошди, шу билан бирга электрлаштирилган участка йўллари сони ҳам кўпайиб бормоқда. Бу турдаги локомотивлар сони энди 7 тани ташкил этмоқда», — дейди Локомотив бошқармаси бошлиғи ўринбосари Акмал Сориев.
Унинг таъкидлашича, электровоздаги компьютерлаштирилган тизими электрон қурилмлаларини ишлаш умрини узайтиради ва хавфсизликни таъминлашга хисса қўшади. Ундан ташқари ушбу электровозлар техник кўриги ҳам олдинги электровозлардан фарқ қилади. Яъни олдинги электровозлар уч кунда бир марта техник кўрикдан ўтса, бу электровозлар 10 кунда бир марта техник кўрикдан ўтказилади.
Хабарда қайд этилишича, мазкур электровозларда Тошкент, Қарши ҳамда Бухоро минтақавий темир йўл узеллар унитар корхоналари ҳудудидаги Тошкент, Сирдарё, Жиззах, Самарқанд, Қарши вилояти йўналишларида ҳаракатланадиган юк поездларига хизмат кўрсатади.
Эслатиб ўтамиз, май ойи ўрталарида Ўзбекистон Россиядан бешта электровоз сотиб олиши хабар берилган эди.
Изоҳ (0)