Чиноз туман марказий шифохонасининг янги биноси очилди. Маросимда Алишер Шодмонов ва Тошкент вилоят ҳокими иштирок этди

Шавкат Мирзиёевнинг 2019 йил июнь ойида Тошкент вилоятига ташрифи давомидаги топшириғи асосида вилоят соғлиқни сақлаш тизимидаги муассасаларни қуриш, реконструкция ва таъмирлаш учун қўшимча 387 миллиард сўм маблағ ҳисобига жами 71 та даволаш профилактика муассасалари қурилиш, реконструкция ҳамда мукаммал таъмирлаш ишлари олиб борилиши белгиланган эди. Унга мувофиқ мустақилликнинг 29 йиллик байрами арафасида Чиноз туман марказий шифохонасининг янги бунёд этилган биноси фойдаланишга топиширилди, деб хабар бермоқда Соғлиқни сақлаш вазирлиги.

Таъкидланишича, ушбу шифохона бунёд этилишига 23,5 миллиард сўм сарфланган. Муассаса энг замонавий тиббий технологиялар билан жиҳозланган бўлиб, беморларга аниқ ташхис қўйиш, самарали даволаш учун барча имкониятлар яратилган.

Болалар бўлими, шошилинч тез ёрдам, терапия ва туғруқхона бўлимлари, умуман олганда, 140 ўринли мазкур замонавий шифохонада нафақат Чиноз тумани, балки қўшни вилоятлар ва туманлар аҳолисига ҳам сифатли ва самарали тиббий ёрдам кўрсатиш имкониятига эга.

«Бу ердаги малакали шифокорлар самарали фаолият юритиши, касалликка чалинган фуқароларнинг сифатли тиббий ёрдам олишлари, ҳатто беморларни кўришга келган яқинлари учун ҳам барча шароитлар яратилган. Бундай қулайлик эса пандемия шароитида аҳолининг тезкор ва зарур тиббиёт ёрдам олишларида муҳим аҳамият касб этиши шубҳасиз.

Бир сўз билан айтганда, мазкур марказий шифохона туман аҳлига, меҳмонларга замонавий ва сифатли тиббиёт ёрдам кўрсатадиган маскан сифатида узоқ йиллар хизмат қилади», – дейилади вазирлик хабарида.

Қайд этилишича, шифохонанинг очилиш маросимида соғлиқни сақлаш вазири Алишер Шодмонов ва Тошкент вилояти ҳокими Рустам Холматов иштирок этган.

Эслатиб ўтамиз, соғлиқни сақлаш вазири Алишер Шодмонов 21 август куни даволаниб ишга қайтган эди. Ундан аввал соғлиқни сақлаш вазири 29 июль куни режали даволаниш учун Республика ихтисослаштирилган кардиология илмий-амалий тиббиёт марказига ётқизилган эди. Ўша вақтда Алишер Шодмоновнинг коронавирусга чалинмагани, ишга 3−4 ҳафтада қайтиши маълум қилинган эди.