Тошкент ерусти ҳалқа метросининг биринчи босқичи ишга тушди

Тошкент шаҳрида лойиҳалаштирилган ерусти ҳалқа метросининг биринчи босқичи ишга тушди, деб хабар бермоқда Ўзбекистон Президенти матбуот хизмати.

Маълум қилинишича, бу лойиҳани лойиҳалаштириш 2017 йилда бошланган. Қурилишнинг бориши давлат раҳбарининг доимий эътиборида бўлган. Айни кунларда ушбу ерусти ҳалқа метросининг биринчи босқичи битказилган.

Президент Шавкат Мирзиёев 29 август куни бу ерга ташриф буюриб, жамоатчилик билан бирга поездда юрди.

«Дўстлик-2» бекатидан «Қўйлиқ» бекатигача бўлган мазкур йўналиш узунлиги 11 километр бўлиб, 7 та бекат барпо этилган. Биринчи бекатдан охиргисигача 19 дақиқада етиб олиш мумкин. Бу масофада ҳар бири 4 та вагондан иборат 4 та поезд қатнайди. Ушбу йўналиш кунига 46 минг йўловчига хизмат кўрсатиш имкониятига эга.

Бекатлар миллий колорит асосида, ўзига хос дизайнда қурилган. Улар йўловчиларга қулайлик яратувчи замонавий технологиялар, йўл кира ҳақини электрон тўлаш имконини берувчи турникетлар, эскалатор билан жиҳозланган. 225 та янги иш ўрни яратилган.

«Қўйлиқ» бекатида кейинги босқичлар қурилиши бўйича тақдимот ўтказилган. Ерусти ҳалқа метроси лойиҳасининг умумий қиймати 422 миллион доллардан зиёд бўлиб, бешта босқичда амалга оширилиши режалаштирилган. Иккинчи босқичда Қўйлиқ бозори билан Тошкент ерости метросининг «Олмазор» бекати боғланади. Учинчи бўлиб «Беруний», ундан кейин «Бодомзор» бекатигача бўлган қисм қурилади. Сўнгги босқичда эса ҳалқа метро линияси яна «Дўстлик» бекатига уланади. Бу йўлларнинг жами узунлиги қарийб 55 километр, бекатлар 35 та бўлади.