Пойтахтдаги Аҳмад Дониш кўчасининг Амир Темур кўчасидан Тошкент халқа автомобиль йўлигача бўлган 2,2 километр қисми 6 қаторли қилиб қайта қурилди. Президент матбуот хизматининг хабар беришича, Шавкат Мирзиёев ушбу кўчада амалга оширилган қурилиш ва ободонлаштириш ишларини бориб кўрди.
Илгари бу кўча ўртасидаги майдон бетон девор билан ўралгани сабабли йўл жудаям тор эди. Юнусобод метро йўналишининг давоми қурилиши натижасида бу жой очилди. Шунингдек, 4 қаторли мавжуд йўл реконструкция қилинди. Пиёдалар ва велосипед йўлакчалари, майсазорлар ташкил этилди. Энергия тежамкор ёритиш мосламалари ўрнатилди.
Эътиборли жиҳати, Аҳмад Дониш кўчаси ўртасидаги яшил ҳудуд ва кўча бўйларидаги дарахтлар сақлаб қолинди ва 1850 та манзарали дарахт кўчати экилди.
«Йўл қурилишига қўшимча пул бериб, замонавий техникалар олингани бугун натижасини беряпти. Бу эса одамларга манфаат, сифат келтириши керак», — деган Шавкат Мирзиёев.
Шунингдек, чорраҳаларда йўл 92 метргача кенгайтирилган. Транспорт воситалари ўнг тарафга тўхтовсиз ҳаракатланиши кўзда тутилган. Бу Аҳмад Дониш, Амир Темур, Боғишамол каби кўплаб кўчалардаги тирбандликни камайтиради. Тошкент ва Қибрай туманлари аҳолисининг пойтахт марказига етиб бориш вақти 2 баробар қисқаради. Ушбу янги трассада бир кунда 60 мингтагача транспорт воситаси ҳаракатланиши мумкин.
«Одамларимиз ҳам, меҳмонлар ҳам йўлга қараб давлатга баҳо беради. Йўллар яхши бўлса, халқимиз рози бўлади. Шунинг учун бундай сифатли йўлларни ҳудудларда ҳам қуриш, қишлоқ йўлларини ҳам ўзгартириш керак», — деган давлат раҳбари.
Шу ерда Юнусобод тумани аҳолиси вакиллари билан мулоқот бўлиб ўтган.
Президент, шунингдек, Тошкентнинг Фарғона йўли кўчасида амалга оширилаётган таъмирлаш ва ободонлаштириш ишларини ҳам бориб кўрган.
Давлат раҳбари бир километр йўл қуришга Ўзбекистон ва хорижда кетадиган маблағ ҳамда материаллар қатламини таҳлил қилиш асосида йўл индустриясини такомиллаштириш бўйича кўрсатмалар бериб, автомагистраллар билан бирга ички йўлларга ҳам алоҳида эътибор қаратиш зарурлиги таъкидлаган.
Эслатиб ўтамиз, июнь ойида Тошкент метросининг «Юнусобод» йўлидаги 2 та янги бекат қуриб битказилган эди. Метронинг янги йўналишлари Аҳмад Дониш кўчасидан ўтган. Кўчани таъмирлаш ишлари метро йўналишлари якунланганидан сўнг бошланган.
Қурилиш ишлари сабабли Аҳмад Дониш кўчасининг Тошкент ҳалқа автомобиль йўлидан Амир Темур шоҳ кўчасигача бўлган қисми 23 августдан 1 сентябргача автотранспорт воситаларининг ҳаракати чекланди. Тошкент ҳокимлиги кўча ёпилиши ҳақида у ёпиб бўлинганидан бир кун ўтиб хабар берди.
Йўл ёпилиши муносабати билан Аҳмад Дониш кўчаси ва Аҳмад Дониш—Янги шаҳар, Аҳмад Дониш—Юнус ота кўчалари кесишган чорраҳалар орқали ҳаракатланувчи 17 та автобус йўналишлари ҳаракатига вақтинчалик ўзгартиришлар киритилган.
Июль ойида Тошкент шаҳар ҳокими ўринбосари Даврон Хидоятов қурилиш ишлари уч босқичда амалга оширилаётгани, илк жараён сентябрь ойида якунланиши тўғрисида хабар берганди. Юнусобод туманидаги йўлнинг буткул якунланиши ноябрь ойига режалаштирилаётгани айтилган.
Изоҳ (0)