Президент Шавкат Мирзиёев Ўзбекистон мустақиллигининг 29 йиллиги муносабати билан давлат хизматчилари ҳамда ишлаб чиқариш ва ижтимоий-иқтисодий соҳалар ходимларидан бир гуруҳини мукофотлаш тўғрисида фармонни имзолаганди. Улар орасида Сардоба тошқини вақтида оқиб кетиб, бедарак йўқолган ва вафот этган Миллий гвардия ходимлари ҳам бор.
Аҳолини эвакуация қилиш тадбирлари вақтида Сирдарё вилоятида жойлашган ҳарбий қисм махсус вазифаларни бажарувчи отряд гуруҳ командири, капитан Санжар Ибрагимов, махсус вазифаларни бажарувчи отряд гуруҳ мутахассиси, оддий аскар Ҳазрат Суюнов, жанговар отряд муҳандис-сапёр гуруҳи мутахассиси, учинчи даражали сержант Ҳусниддин Суяров сув тошқинида оқиб кетганди.
Қидирув натижасига кўра, капитан Ибрагимов ҳодиса жойидан 15 километр узоқликдаги масофада соғ ҳолда топилган. Учинчи даражали сержант Суяровнинг жасади 3 май куни соат 08:00 ларда Сирдарё вилояти Оқолтин туманидаги Аҳиллик қишлоғи «Кичик Бобур» маҳалласидан топилган. Оддий аскар Ҳазрат Суюновни қидириш бўйича ишлар давом этаётгани айтилганди.
Президент фармони билан бедарак йўқолган Ҳазрат Суюнов ва марҳум Ҳусниддин Суяров «Жасорат» медали билан тақдирланди. Санжар Ибрагимовга эса «Мардлик» ордени берилди. Шунингдек, Миллий гвардия Наманган вилояти қўриқлаш бошқармаси гуруҳ сафдор ходими, марҳум Абдулҳоди Абдулвоҳидов ҳам «Жасорат» медали билан тақдирланди.
Бундан ташқари, Қорақалпоғистон Ички ишлар вазирлиги Патруль-пост хизмати ва жамоат тартибини сақлаш бошқармаси кинология хизмати бўлими бошлиғи, подполковник Есемурат Қайипназаров «Жасорат» медали билан тақдирланган. Подполковник 24 июль куни 49 ёшида коронавирусдан вафот этганди.
Аввалроқ Шавкат Мирзиёев мустақилликнинг 29 йиллиги муносбати билан фан, таълим, адабиёт, маданият, санъат ва ОАВ ходимларини мукофотлагани, улар орасида «Дарё» муҳаррири Дилшод Шарипов ҳам ўрин олгани хабар берилганди.
Изоҳ (0)