Самарқанд шаҳридаги тайёрлаш марказида 100 ўринли реанимация бўлими ташкил этилди

Самарқанд шаҳридаги Олимпия захиралари тайёрлаш маркази биносида ташкил этилган 1080 ўринли ташхислаш ва саралаш марказида оғир беморлар учун алоҳида 100 ўринли реанимация бўлими ташкил этилди. Марказда фаолият олиб бориш учун 50 нафар врач, 100 нафар ҳамшира, 110 нафар бошқа ёрдамчи ходим бириктирилган. Бу ҳақда «Дарё» мухбири Фарҳод Норбўтаев хабар берди.

Пандемия даврида аҳолига тиббий хизмат кўрсатиш учун жалб этилган тиббиёт ходимларини моддий ва маънавий рағбатлантириш мақсадида шу кунгача 169 нафар тиббиёт ходимига 256,6 миллион сўм (6 фоизлик) тўловлар амалга оширилган.

Жумладан, 53 нафар врачга 111, 4 миллион сўм, 58 нафар ҳамширага 80,5 миллион сўм, кичик тиббий ходимларга 64,2 миллион сўм ва 1 нафар бошқа ходимга 356,6 минг сўм тўлов амалга оширилган.

Шунингдек, 14 нафар тиббиёт ходимига махсус тўловлар амалга оширилган. Хусусан, 5 нафар врачга 25 миллион сўмдан, 5 нафар ҳамширага 15 миллион сўмдан, 3 нафар кичик тиббий ходимга 10 миллиондан ва 1 нафар бошқа ходимга (электрик) 5 миллион сўм рағбатлантириш берилган.