Самарқанд шаҳар ҳокимлиги 149 500 та оиланинг ижтимоий аҳволини ўрганиб чиқди

Самарқанд шаҳар ҳокимлиги томонидан шаҳардаги мавжуд 149 500 оиланинг ижтимоий аҳволи ва турмуш шароити ўрганиб чиқилди. Ўрганиш жараёнида 5613 та оила муҳтож оила сифатида «темир дафтар»га киритилган. «Темир дафтар»га киритилган оилаларга «Саховат ва кўмак» ҳаракати доирасида шу вақтга қадар жами 10,5 миллиард сўмлик ижтимоий кўмак берилган. Бу ҳақда «Дарё» мухбири хабар берди.

Самарқанд шаҳар ҳокимлиги ахборот хизматининг маълум қилишича, саховатпеша тадбиркорлар ҳамда сахий фуқаролар томонидан жами 5,2 миллиард сўмлик озиқ-овқат маҳсулотлари ва республика бюджетидан Қурбон ҳайити арафасида 1348 та оилага 1 миллион сўмдан 1 миллиард 348 миллион сўм пул маблағлари берилган.

Аҳолининг эҳтиёжманд қатламини қўллаб-қувватлаш борасида 2020 йилнинг 30 июль куни қабул қилинган «Коронавирус пандемияси даврида ижтимоий ҳимояга ва ёрдамга муҳтож аҳоли қатламларини моддий қўллаб-қувватлашга доир қўшимча чора-тадбирлар тўғрисида»ги Президент фармонига асосан 18 661 нафар аъзоси бўлган 4 579 та оилага 4,1 миллиард сўмлик моддий ёрдам кўрсатилган. Шунингдек, шаҳарда меҳнатга лаёқатли, аммо ишсиз 4792 нафар фуқаронинг 3661 нафари иш билан таъминланган.

Эслатиб ўтамиз, аввалроқ Самарқандда ишсиз фуқаролар сони 61 мингга яқинлашгани, шундан 28 мингдан ортиғи ишсиз аёллар экани хабар берилганди.