С.А.Зверев номидаги Красногорск заводи «Армия-2020» форуми доирасида ҳаводаги вирусларни, жумладан, COVID-19’ни ҳам аниқлай оладиган Россиядаги илк қурилмани тақдим этди. Бу ҳақда корхона бош директори Александр Новиковга таяниб, Hi-Tech.Mail.ru хабар берди.
Унинг сўзларига кўра, «Детектор-БИО» номини олган тиббий-биологик қурилма нафақат вирус борлигини, балки бактерия ва токсинларни ҳам аниқлай олади.
«Бу Соғлиқни сақлаш вазирлиги қошидаги Гамалея институти билан ҳамкорликдаги ихтиро. Бу каби қурилма ёрдамида ҳавонинг автоматик таҳлили учун патоген ва бошқа омиллар концентрациясидан келиб чиқиб, 10 дақақадан 30 дақиқагача вақт сарфланади», — дейди Новиков.
Қурилмани синовдан ўтказиш ишлари июнда якунланган, унинг сертификацияси тайёрланмоқда, шу сабабли буюртмалар ҳақида ҳозирча гапиришга эрта.
«Бироқ биз максимал даражада тайёрмиз ва зарурат туғилганида буюртмачи қанча хоҳласа, шунча тайёрлаб бера оламиз. Муҳим жиҳати, қурилма ҳаводаги турли патогенларни аниқлай олади, шу сабабли уни фуқаролик мақсадларида ҳам, биологик хавфсизликни таъминлашда ҳам фойдаланиш мумкин», — дея таъкидлайди завод директори.
«Детектор-БИО» бир вақтнинг ўзида 86 та вирусли инфекция касалликлари ва бактерия қўзғатувчиларини, шунингдек, автоматик режимда атроф-муҳитдаги токсинларни аниқлашга қодир.
Таҳлил иккита мустақил усул ёрдамида амалга оширилади — полимераза занжир реакцияси ва иммунофлуоресценция усуллари. Қурилма одамлар оммавий тўпланадиган жойларда, оммавий тадбирларни ўтказишда хавфсизликни таъминлашга мўлжалланган.
Эслатиб ўтамиз, март охирларида Россияда коронавирусни юқори аниқликда аниқловчи тест яратилган эди.
Изоҳ (0)