Ванкуверда Мурат Айфер исмли дастурчи фалсафий саволларга жавоб бериб, ҳаёт мазмуни ҳақида фикр юритишга қодир сунъий интеллектни яратди, деб хабар беради The Next Web.
Philosopher АI номини олган дастур Open AIGPT-3 нейроалгоритми ёрдамида матнларни таҳлил қилади ва шундан сўнг таклиф этилган мавзуни муҳокама қилади ёки берилган саволга жавоб қайтаради.
«Сунъий интеллект-файласуфнинг жавоблари ҳар сафар турлича ва бир-бирга зид келиши мумкин. У билан хоҳлаганча суҳбатлашса бўлади», — дейилади хабарда.
Дастурчининг сўзларига кўра, сунъий интеллект ўз ғояларини генерация эмас, балки шунчаки «билим мавжудлигини имитация» қилади.
Шу билан бирга, виртуал файласуф айрим саволларни муҳокама қилишдан бош тортади. Масалан, алгоритм энг ёмон дин қайси эканлигига жавоб беришни истамайди ва ўзи ҳамда дастурчи учун кўнгилсизликлар олиб келиш ниятида эмаслигини маълум қилади.
Айфер нима сабабдан сунъий интеллект айрим саволларга жавоб қайтармаслигига изоҳ бермаган, бироқ тизимга кўпроқ шахсиятларни ва суҳбат мавзуларини қўшиш ниятида эканлигини билдирган. Дастурчи келажакда лойиҳани бирор ўйинга айлантиришни режалаштирмоқда.
Изоҳ (0)