YouTube’даги Rich Rebuilds ники остида фаолият юритувчи видеоблогер Tesla электромобилларининг турли модификациялари билан анчадан буён шуғулланиб келади. Яқинда у ўз тажрибаларидан фойдаланган ҳолда тўлиқ электр Cyberquad квадроциклини яратишга қарор қилди.
Эслатиб ўтамиз, Tesla 2019 йилда шу турдаги аппаратини тақдим этганди. Бироқ ҳозирча Cyberquad электро-квадроцикли серияли равишда ишлаб чиқарилмаган, Ричининг нусхаси ушбу ғоя асосида яратилган.
Tesla Cyberquad тақдимотида ишлаб чиқарувчи ўз аппратини Yamaha Raptor 700R базасида яратганидан хабардор блогер ўз лойиҳаси учун Facebook Marketplace орқали минилган Raptor сотиб олган.
Кейинги қадам эса унга мос келадиган электродвигатель ва батарея аккумуляторини қидириш бўлган. Бунинг учун донор сифатида 3000 долларга электромотоцикл топилган. Ундаги двигатель ва аккумулятор батареялари Raptor’га ўрнатилган.
Бироқ катта аккумулятор батареяси ва кучли электродвигателни серияли квадроциклга мослаштириш осон кечмаган. Шу сабабли аккумуляторни двигатель ўрнига, электродвигателни эса орқа «подвеска» ричагига ўрнатишга тўғри келган.
Шундан сўнг квадроцикл тўлиқ Cybertruck услубида ўткир бурчакли алюминий панеллари билан жиҳозланган. Натижада 96 километр соат тезликка 3,9 сонияда эриша оладиган самарали ва динамик квадроцикл модели пайдо бўлган. Қурилманинг максимал тезлиги 164 км/соатга етади.
Аввалроқ америкалик блогер Tesla Cybertruck чиндан ҳам ўқ ўтказмаслигини синаб кўрган эди.
Изоҳ (0)