Microsoft Word дастурига аудиоёзувни матнга айлантирувчи функцияни қўшди
Microsoft компанияси ўзининг Word матнлар муҳарририга аудиоёзувларни матнга айлантириш функцияси Transcribe’ни қўшди. Функция нутқни бевосита унинг ёзилиши вақтида матнга айлантириши ёки юкланган файлнинг матн ҳолатдаги кўринишини акс эттириши мумкин.
Эндиликда фойдаланувчилар дастурда бирор нутқ ёзишлари ёки унга mp3, wаv, м4а ёки мp4 форматидаги аудио ва видеоёзувларни юклашлари мумкин. Тайёр матнни эса таҳрир қилиб, асосий файлга қўшса бўлади. Агар нутқ ёзилишида икки киши иштирок этган бўлса, Transcribe буни кўрсатади.
Фойдаланувчи расшифровка қилинган матн бўйича ҳаракатланиб, унинг муайян парчасига аудиоёзувда тўғри келувчи парчага ўтиши, аудиони турли тезликда тинглаши мумкин.
Ушбу функция Microsoft 365 сервиси фойдаланувчилари учун веб-версияда мавжуд ва ҳозирча инглизча нутқларни матнга ўгиради. Компания бошқа тилларни кейинроқ қўшишга ваъда бермоқда.
Бироқ аудиоёзувлар билан ишлашда баъзи чекловлар мавжуд: файл 20 мегабайтдан кичик бўлиши, расшифровка қилинадиган аудиоёзув давомийлиги эса ойига 5 соатдан ошмаслиги керак. Айни вақтда қўшимча вақт ва мегабайт сотиб олиш имкони йўқ. Компания функциянинг мобил версиясини шу йилнинг охирига қадар тақдим этади.
