Франция президенти Эммануэль Макрон ҳамда Германия канцлери Ангела Меркель Беларусь давлат раҳбари Александр Лукашенко уларнинг қўнғироғига жавоб бермаганидан кейин биринчи бўлиб Россия етакчиси Владимир Путин билан боғланишга уринган. Бу ҳақда «Интерфакс» хабар берган.
«Билишимча, улар биргина Россия президентининг ўзига қўнғироқ қилмаган. Икки Европа етакчи давлати раҳбарларининг телефонига Минскда бўлган Александр Лукашенко ҳам жавоб бермаган», — дея Эстония бош вазири Юри Ратаснинг сўзларидан иқтибос келтирган ERR канали.
«Россия Беларусь борасидаги масалаларда ва умуман минтақада муҳим рол ўйнайди ва бу факт. Аслида ҳам шундай. Германия канцлери ва Франция президенти Эммануэль Макроннинг билдирган таклифи ҳам Беларусдаги муаммони ҳал этишда муҳим аҳамиятга эга. Бунда халқаро кузатувчилар ҳам иштирок этиши мумкин», — деган Ратас.
«Лекин барчага кейинчалик маълум бўлганидек Лукашенко ушбу таклифни рад қилган», — дея қўшимча қилган Эстония ҳукумати раҳбари.
Эслатиб ўтамиз, Беларусдаги президентлик сайловлари 9 август куни ўтказилган. МСК маълумотига кўра, Лукашенко 80,1 фоиз овоз билан сайловларда ғолиб деб топилган. У мамлакатни 26 йилдан буён бошқариб келмоқда. Сайлов куни Минск марказида ҳарбий техника пайдо бўлган.
Беларусь милицияси сайлов участкалари олдида тўпланган одамларни қўлга олган. Сайлов куни оқшомида мамлакатнинг барча етакчи оммавий ахборот воситаларининг сайтлари очилмай қолган. Минскда президент сайловларидан кейин норозилик намойиши бошланган. Шундан буён мамлакатда норозилик намойишлари ва намойишчиларни қўллаб-қувватлаш учун чиқишлар давом этмоқда.
Изоҳ (0)