Таиланд ҳукумати 1 октябрдан бошлаб хорижлик сайёҳларнинг Пхукет оролига киришига рухсат беришга қарор қилди, бироқ туристларга нисбатан икки ҳафталик мажбурий карантин тартиби сақлаб қолинади. Бу ҳақда Travel off Path хабар берган.
Таиланддаги миллий туризм бошқармаси раҳбари Ютасак Супасорн ҳам 1 октябрдан бошлаб Пхукет оролининг хорижлик туристлар учун очилишини билдирган. Ҳукумат оролни хорижликлар учун очиш орқали бошқа провинцияларнинг ҳам очилишига тайёргарлик кўриб олмоқчи ва халқаро туризмни қайта тиклашни режалаштирган.
Порталда ёзилишича, қироллик ҳудудига кириш талаби етарли даражада қатъий ва бу туристлар оқимининг кескин кўпайишига йўл қўймайди. Хорижликлар дастлаб Пхукет оролига келиши лозим, сабаби мамлакатнинг қолган ҳудудларига парвозлар шу ердаги аэропорт орқали амалга оширилади. Шунингдек, сайёҳлар Пхукетда камида 30 кун бўлиши, 14 кун давомида меҳмонхонада карантинга риоя этиши лозим. Айрим меҳмонхоналарда туристларнинг ташқарига чиқишига рухсат этилади ва улар соҳил бўйига ҳам бориши мумкин. Туристлар карантинга риоя қилиш билан параллел равишда 2 та ПЗР-тести топшириши зарур. Мазкур шартларнинг барчаси бажарилган тақдирда шаҳар бўйлаб экскурсиялар ва кўнгилочар жойларга бориш имкони туғилади.
Пхукетдан кетишда ҳам коронавирусга топширилган тестнинг манфий натижаси ҳақида маълумотнома талаб қилиниши мумкин.
Таиланднинг бошқа ҳудудларига бориш учун икки ҳафта карантинда бўлиш ва учинчи марта COVID-19 тестини ҳам топшириш керак. Агар натижа манфий чиқса, турист оролни тарк этишига рухсат берилади.
Таиланд ҳукумати ҳали қайси хориж давлатларининг фуқароларининг Пхукетга киришига рухсат берилиши борасида бир қарорга келгани йўқ. Тахминларга кўра, коронавирусга қарши курашда муваффақиятга эришган қўшни давлатлар ва қироллик билан мустаҳкам ижтимоий-иқтисодий алоқаларга эга мамлакатларга бу борада устунлик берилади.
Таиланд мамлакатга кириши мумкин бўлган фуқаролар рўйхатини ҳам кенгайтириб бормоқда. Улар орасида дипломатлар, БМТ вакиллари, хизмат сафари билан борганлар, кўргазма ёки соғломлаштириш турига келган хорижликлар бор.
Аввал Таиланд қироллигининг хорижлик туристлар учун 2021 йилгача очилмаслиги мумкинлиги ҳақида хабар берилган. Эслатиб ўтамиз, 2019 йилда Таиландга 40 миллионга яқин турист ташриф буюрганди.
Изоҳ (0)