Буюк Британия бош вазири Борис Жонсон ҳукумат раҳбари сифатидаги олти ой давом этган фаолиятидан кейин, коронавирус асоратлари ва соғлиғидаги муаммолар сабаб истеъфога чиқиши мумкин. Бу ҳақда Британия нашрлари Жонсоннинг яқин қариндоши берган маълумотга таяниб хабар берган.
Ушбу мавзуга биринчилардан бўлиб The Times газетаси қўл урган. Мақолада муаллифнинг бош вазир маслаҳатчиси Доминик Каммингснинг қариндоши билан суҳбатлашгани ҳақида ёзган. Хабарга кўра Жонсон ҳали ҳам коронавирус инфекциясининг асоратларидан азият чекмоқда ва агар касаллик ўтиб кетмаса келаси йил бошида истеъфога чиқмоқчи.
Каммингснинг қайнатаси Хамфри Уэйкфилд журналист билан суҳбатда Жонсонни «жароҳатланган отга» қиёслаб, бош вазирнинг касаллиги сурункали эканини қайд этган.
«Агар жароҳат олган отни аввалги ишларини қилишга қайтара олмасангиз, у ҳеч қачон тузалмайди», – дея Уэйкфилд сўзларидан иқтибос келтирган The Times.
Bloomberg агентлиги Жонсоннинг матбуот хизмати бу борада изоҳ беришни истамагани, аммо Британия расмийлари бундай тахминлар матиқсиз эканини айтгани ҳақида ёзган.
Шунингдек, Business Insider нашри Даунинг-стритдаги манбасига таяниб бу каби хабарларнинг ёлғонлиги хусусида хабар чоп этган.
Жонсон 2020 йилнинг март ойи охирида коронавирусга чалинган, бир неча кун давомида интенсив терапия палатасида даволанган, кейин тузалиб яна иш жойига қайтганди. У соғайганидан сўнг ортиқча вазн муаммосига эга британияликлардан озишга ҳаракат қилишларини сўраган, уларни COVID-19 асоратлари оғир кечиши ҳақида огоҳлантирган.
Буюк Британияда сайловлар ўтган йили декабрь ойида бўлиб ўтган ва Жонсон рақобатчиларидан устун ҳолда бош вазир лавозимига сайланган. Бирлашган қиролликдаги кейинги парламент сайловлари 2024 йилда ўтказилади.
Изоҳ (0)