TikTok видеосервиси раҳбарияти АҚШ президенти Дональд Трампни судга берди. Бунга Трампнинг АҚШ фуқароларига TikTok’ка эгалик қилувчи Хитойнинг ByteDance компанияси билан битим имзолашни тақиқлагани сабаб бўлган. Даъво аризаси ҳақида TikTok ўзининг блогида маълум қилган.
Сервис вакилларининг сўзларига кўра, Америка ҳукумати сервиснинг Хитой ҳукумати билан алоқаси АҚШ миллий хавфсизлигига таҳдид туғдириши борасидаги версиясига бирор далил келтирмаган.
Шунингдек, TikTok’нинг маълум қилишича, АҚШ ҳукумати сервиснинг ўзини ишончли эканлигини исботлашга бўлган уринишларини эътиборсиз қолдирган. Хусусан, TikTok’даги америкалик фойдаланувчиларнинг маълумотлари Хитойдан ташқарида сақланиши тўғрисидаги факт инобатга олинмаган.
АҚШ ҳукуматига қарши алоҳида даъво аризасини TikTok’нинг Патрик Райан исмли ходими киритган. Унинг таъкидлашича, Трампнинг қарори TikTok’нинг АҚШда ишлайдиган 1,5 минг ходимини маошсиз қолдириши мумкин.
Аввалроқ инвесторлар Хитойнинг ByteDance компаниясига тегишли TikTok сервисини 50 миллиард долларга баҳолагани, 1 августда Microsoft TikTok сервисини сотиб олиш бўйича музокаралар ўтказаётгани ва АҚШ президенти Дональд Трамп ижтимоий тармоқни мамлакат ҳудудида тақиқлаш ниятида эканлигини маълум қилгани ҳақида хабар берилганди.
Изоҳ (0)