Жиззах вилоятида автобус ва юк машинаси иштирокида юз берган йўл-транспорт ҳодисаси оқибатида юк машинаси ҳайдовчиси ва унинг йўловчиси вафот этди. Бу ҳақда Ички ишлар вазирлиги Йўл ҳаракати хавфсизлиги бош бошқармаси хабар берди.
Маълум қилинишича, 25 август куни соат 14:32 да Жиззах вилояти ҳудудидан ўтган халқаро аҳамиятга эга М39 Термиз—Тошкент автомобиль йўлининг 965-километрида ҳайдовчи, 1983 йилда туғилган М.Р. бошқарувидаги Zhongtong Bus русумли автобус ўзидан олдинда кетаётган ҳайдовчи, 1979 йилда туғилган Х.А. бошқарувидаги Isuzu юк машинасининг чап ён томонига урилиб, ЙТҲ содир этган.
Натижада Isuzu юк машинаси ҳайдовчиси бошқарувни йўқотган, юк машинаси йўлнинг ўнг томонидаги бетон тўсиққа урилиши оқибатида ағдарилган. Юк машинасининг ағдарилиши оқибатида ушбу машина ҳайдовчиси, 41 ёшли Х.А. ва унинг салонида бўлган йўловчи, 17 ёшли А.Н. оғир тан жароҳатлари билан воқеа жойида вафот этган.
Мазкур ЙТҲ юзасидан Пахтакор тумани ИИБ томонидан дастлабки терговолди суриштирув ҳаракатлари олиб борилмоқда.
Изоҳ (0)