Коронавирусдан сўнг организмда қандай ўзгаришлар бўлиши, вирус қайси аъзоларга кучли таъсир ўтказиши бўйича таҳлиллар ўтказилади. Бу ҳақда Коронавирусга қарши кураш штаби аъзоси, профессор Севара Убайдуллаева «Шифобахш» Telegram каналига маълум қилди.
Севара Убайдуллаеванинг айтишича, коронавирусдан даволангандан сўнг ошқозоности бези, ошқозон ва ичак касалликлари бўйича мурожаатлар кўпроқ келиб тушмоқда.
«Коронавирус ўпкада кечса ҳам, ошқозон, ошқозоности бези, ичак, ўт пуфагидаги жароҳатлар бир ярим, икки ойлаб узоқ тикланмоқда. Асаб тизим касалликлари бор инсонларга ҳам кучи таъсир қилаётгани кузатилмоқда. Ҳозирча бу кузатишларимиз натижаси. Келажакда коронавирусдан сўнг организмда қандай ўзгаришлар бўлиши, вирус қайси аъзоларга кучли таъсир ўтказиши ҳақида таҳлил натижасини берамиз», — деди мутахассис.
Унинг қўшимча қилишича, Европа давлатлари орасида кўпроқ Осиё ирқига хос ва қони резус-манфий бўлган инсонларда вируснинг юқиши, касалликни оғирроқ кечиришга мойиллиги юқорилиги кузатилган.
Изоҳ (0)