7 август куни Навоий вилояти Нурота тумани ҳудудидан ўтган автомобиль йўлида содир бўлган йўл-транспорт ҳодисаси оқибатида бир киши ҳалок бўлди. Бу ҳақда вилояти ИИБ ахборот хизмати хабар берди.
Маълумотларга кўра, 4Р-55 автомобиль йўлининг 94-километрида Damas машинасини бошқариб келаётган 57 ёшли ҳайдовчи ухлаб қолиши оқибатида йўл четига чиқиб кетиб, аварияга учраган.
ЙТҲ оқибатида автомашинада йўловчи сифатида кетаётган, 1975 йилда Самарқанд вилоятида туғилган йўловчи Р.Н. оғир тан жароҳати олиб ҳалок бўлган.
Мазкур ҳолат юзасидан ҳайдовчига нисбатан Жиноят кодексининг 266-моддаси 2-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган.
Аввалроқ Чироқчида Nexia ва Howo юк машинаси иштирокида содир бўлган ЙТҲ оқибатида 3 киши ҳалок бўлгани, Фарғонада Damas ва Labo тўқнашувида эса бир ҳайдовчи вафот этгани, Сирдарёда «КамАЗ» пиёдани уриб юборгани тўғрисида хабар берилганди.
Изоҳ (0)