Германиядан 10 нафар тажрибали мутахассисдан иборат делегация коронавирусга қарши курашда Ўзбекистонга кўмак бериш ва тажриба алмашиш учун йўлга чиққан ва Тошкент халқаро аэропортида Соғлиқни сақлаш вазирлиги мутасаддилари томонидан кутиб олинади. Бу ҳақда вазирлик ахборот хизмати хабар қилди.
Роберт Кох институти Халқаро соғлиқни сақлаш маркази директори ўринбосари, Халқаро соғлиқни сақлаш ахборот маркази раҳбари, доктор Андреас Янсен раҳбарлигидаги гуруҳ таркибида институтнинг етакчи эксперт ва мутахассислари, шунингдек, Франкфурт Майн ва Дюссельдорф университетлари клиникаларининг юқори малакали шифокорлари, Жаҳон соғлиқни сақлаш ташкилотининг Европа минтақавий бюроси вакиллари бор.
Германиялик мутахассислар ташриф давомида Республика коронавирусга қарши кураш штаби масъуллари билан биргаликда Ўзбекистонда COVID-19’га қарши кураш борасидаги ҳолатни таҳлил қилади ва тегишли тавсиялар беради.
Шунингдек, улар Вируслогия илмий текшириш институти клиникасида, Зангиота туманидаги юқумли касалликлар шифохонаси, вилоятлардаги ушбу соҳага ихтисослашган қатор шифохоналар, тиббий марказ ва лабораториялар фаолияти билан яқиндан танишади. Делегация вакиллари коронавирусни аниқлаш, назоратга олиш ва беморларни даволашда маҳаллий шифокорларга амалий кўмак беришни режалаштирган.
Ўзбекистонга шу вақтгача коронавирусга қарши курашда ёрдам бериш учун 15 нафар хитойлик шифокор ва тиббиёт мутахассисидан иборат гуруҳ, таркибида анестезиолог, реаниматолог, юқумли касалликлар бўйича мутахассис, эпидемиолог, терапевт ва кардиолог бор 40 нафар россиялик шифокор келган бўлса, март ойининг охиридан бошлаб Ўзбекистонда кореялик профессор — эпидемиолог Сой Чже Ук, яна бир кореялик анестезиолог-реаниматолог, бир қанча туркиялик мутахассислар, Германиянинг етакчи тиббиёт мутахассисларидан бўлмиш профессор Вернер Бер фаолият юритган. Шунингдек, 18 август куни Ўзбекистонга Хитойдан 10 нафар тиббиёт мутахассислари келиши кутилаётгани ҳақида хабар берилганди.
Изоҳ (0)