Тошкентда Мудофаа вазирлиги спорт марказининг замонавий ўқ отиш ўқув-машғулотлар базаси очилди. Бу ҳақда Жисмоний тарбия ва спорт вазирлиги хабар берди.
Айни пайтда мамлакатда ўқ отиш спорти билан 3700 нафарга яқин ўғил-қиз мунтазам шуғулланиб келмоқда, шундан 800 нафарга яқини хотин-қизлар. Уларга 136 нафар мураббий ўқ отиш спорти сир-асрорларини ўргатиб келмоқда. Ўзбекистонда мавжуд ТИРлар, яъни ўқ отиш мажмуалари 122 тани ташкил қилади. Мамлакат терма жамоаси таркибига ўқ отиш спортидан 48 нафар спортчи таклиф этилаётган бўлса, шундан 10 нафари Мудофаа вазирлиги спорт маркази аъзолари саналади.
Тантанали очилиш маросимида мудофаа вазири Баҳодир Қурбонов, жисмоний тарбия ва спорт вазирининг биринчи ўринбосари Равшан Эрматов, Мудофаа вазирлиги спорт марказининг номдор спортчилари, Ўзбекистон ўқ отиш спорти федерацияси вакиллари ҳамда спорт фахрийлари иштирок этди.
Тадбирда сўзга чиққан Равшан Эрматов спортчи учун энг аввало спорт инфратузилмаси ҳамда замонавий спорт инвентарлари, қолаверса, малакали тренерлар кераклигини таъкидлаб, бу борада бугун фойдаланишга топширилган ўқ отиш спорти ўқув-машғулотлар базасида яратилган шароитлар ва мавжуд ўқ отиш қуроллари халқаро талабларга жавоб бериши, мураббийларнинг салоҳияти юқори эканлиги тез орада ушбу спорт тури ривожида ўз самараларини беришини айтиб ўтди. Бу борада Жисмоний тарбия ва спорт вазирлиги ўз томонидан барча ёрдамни беришга тайёрлигини ҳам билдирган.
Тадбир якунида мамлакатда жисмоний тарбия ва спорт ривожига муносиб ҳисса қўшиб келаётган бир гуруҳ мутахассислар Мудофаа вазирлиги томонидан эсдалик совғалари билан тақдирланди.
Изоҳ (0)