Қашқадарё вилоятида Ўзбекистон ҳудудида 1992 йилдан бери истиқомат қилиб келган 24 нафар кишига фуқаролик паспорти топширилди, дея хабар берди «Дарё» мухбири.
Таъкидланишича, вилоят ИИБ Миграция ва фуқароликни расмийлаштириш бошқармаси Ўзбекистон Республикасининг 2020 йил 13 мартдаги «Ўзбекистон Республикаси фуқаролиги тўғрисида»ги қонунининг янги таҳрирдаги ўзгаришларига мувофиқ вилоят ҳудудида яшаётган, бироқ фуқаролиги бўлмаган 5893 нафар шахсга фуқаролик бериш ишларини бошлаган.
«Икки кундан сўнг туғилган куним. Фуқаролик паспорти туғилган кунимга муносиб совға бўлди. 1992 йилдан бери фуқароликсиз яшаб келаётгандим. Мактабда директорнинг маънавий-маърифий ишлар бўйича ўринбосари лавозимида ишлайман. Шундай вақтлар бўлдики, фуқаролигим бўлмагани боис ҳатто кўрик-танловларнинг вилоят босқичларида ҳам иштирок этиш насиб этмади. Аммо у кунлар энди ортда қолди», — дейди Нишон туманининг Толлимаржон шаҳарчасида яшовчи Раҳматилла Тўраев.
Маълум қилинишича, вилоятда айни кунда 9367 нафар фуқаролиги бўлмаган шахс истиқомат қилади.
«Ҳозирги кунга қадар 781 нафар фуқаролиги бўлмаган шахслар фуқаролиги тан олинишини сўраб мурожаат қилган. Шундан 302 нафарига Ички ишлар вазирлигининг ижобий фикр-мулоҳазаси олиниб, фуқаролик берилиши режалаштирилган. Кеча дастлабки 24 нафар кишига фуқаролик паспорти топширилди», — дейди ИИБ Миграция ва фуқароликни расмийлаштириш бошқармаси катта инспектори Фаёз Қурбонов.
«Ўзбекистонга 1992 йил ноябрь ойида Тожикистон Республикасидан келганман ва ўшандан бери Ғузор туманида яшайман. Фуқаролик паспорти берилишини 28 йил кутдим», — дейди ғузорлик 81 ёшли Абдимурод Тўраев. — Ўтган йиллар давомида фуқароликсиз яшаш нақадар қийинлигини ҳис қилдим. Ҳатто, сайлаш ва сайланиш ҳуқуқларидан маҳрум эдик.
Изоҳ (0)