Коронавирусга қарши курашиш штаби аъзоси Барно Абдусаматова АОКА залида ташкил этилган брифингда коронавирусга чалинган ҳомиладор аёллар масаласидаги айрим саволларга тўхталиб ўтди.
Жумладан, «Коронавирус инфекцияси тасдиқланган ҳомиладор аёлда туғруқ муддати етмаган бўлса, ҳомиладорлик давом эттириладими ёки тўхтатиладими?», деган саволга мутахассис қуйидагича жавоб берган:
«Агар коронавирус инфекцияси мавжуд бўлган ҳомиладор аёлнинг аҳволи оғир ёки ўта оғир деб баҳоланадиган бўлса, диагностик мезонларга мувофиқ, ҳаётий кўрсатмаларга кўра, ҳомиладорлик муддатига қарамай туғдиришни амалга ошириш керак».
Мавзуга доир: Ўзбекистонда туғруқхонага келаётган ҳомиладор аёллардан тест топшириб келиш талаб қилинаётганига аниқлик киритилди
Шу билан бирга, Абдусаматова коронавирус билан хасталанган ҳомиладор аёлларни касалхонадан чиқаришда қандай кўрсаткичларга қаралишини ҳам айтиб ўтган. Маълум бўлишича, ҳомиладор аёлларда клиник белгиларнинг турғун яхшиланиши, уч кун давомида тана ҳарорати нормада бўлиши, лаборатор кўрсаткичлар нормаллашиши, нафас етишмовчилиги белгилари йўқлиги, камида 24 соат оралиқ билан кетма-кет икки марта ПЗР усулида COVID-19 тест натижалари манфий бўлиши беморнинг касалхонадан чиқарилишига асос бўлади.
Шифокор кўрсатмасига кўра рентгенография ёки компьютер томография текшируви буюрилади, агар тавсия этилмаса, тушишнинг ҳожати йўқлиги билдирилди.
Эслатиб ўтамиз, аввалроқ Коронавирусга қарши курашиш штаби аъзоси, профессор Ҳабибулло Оқилов эмизикли оналар коронавирусга чалинган бўлса, фарзандини қандай эмизиши борасида аниқлик киритиб ўтган, Соғлиқни сақлаш вазирлиги томонидан Ўзбекистонда коронавирусга чалинган ҳомиладор аёллар учун қандай шароитлар яратилгани ҳақида маълумот берилган эди.
Изоҳ (0)