Президент Шавкат Мирзиёев Тошкент шаҳар Бектемир туманига ташрифи давомида туман фаоллари билан учрашди. Бу ҳақда Президент матбуот хизмати хабар берди.
Таъкидланишича, Бектемир тумани Тошкент шаҳри саноатининг 10 фоизини таъминлайди. 2020 йилнинг ўтган даврида бу ерда саноат маҳсулоти 9 фоизга, хизмат кўрсатиш 8 фоизга, экспорт 11 фоизга ўсган.
Учрашувда туманда янги «ўсиш нуқталари»ни топиш ва аҳоли ҳаётини яхшилаш борасидаги режалар айтиб ўтилди.
Масалан, Бектемир туманига Тошкент вилоятининг Ўрта Чирчиқ ва Юқори Чирчиқ туманларидан жами 1639 гектар ер ўтказилади. Натижада туман ҳудуди 3472 гектарга етади. Бунинг ҳисобига янги саноат ва хизмат кўрсатиш объектлари барпо этиш, минглаб иш ўринлари очиш имконияти яратилади.
Яқин уч йилда туманда умумий қиймати 3,3 триллион сўмлик 61 та инвестиция лойиҳасини амалга ошириш режалаштирилган. Жумладан, 2020 йилда 52 та шундай лойиҳа ишга туширилиб, 2700 дан зиёд янги иш ўрни яратилиши мўлжалланган.
Туманда ишсизлик даражаси 3,3 фоиз, шу жумладан, аёллар орасида 1,7 фоиз, ёшлар ўртасида 1,5 фоиз экани қайд этилди. Мактабгача таълим муассасалари етишмаслиги, қатор маҳаллаларда ички йўллар ҳолатининг ёмонлиги, коммунал тизимларда ҳам камчиликлар борлиги кўрсатиб ўтилди.
Ёшлар ва хотин-қизлар бандлигини ошириш, камбағалликни камайтириш, уй-жойга муҳтож оилаларга уй ажратиш бўйича кўрсатмалар берилди.
Хизмат кўрсатиш соҳасини кескин ривожлантириш, янги ижтимоий объектлар барпо этиш, коммунал тармоқларни қуриш ва таъмирлаш, уй-жой фондини куз-қиш мавсумига тайёрлаш масалаларига тўхталиб ўтилди.
Давлат раҳбари маҳалла раислари, ёшлар етакчилари билан мулоқот қилди.
Эслатиб ўтамиз, Шавкат Мирзиёев 21 август куни Тошкент шаҳар Бектемир туманида бажарилаётган ишлар, саноат корхоналари фаолияти билан танишди. Давлат раҳбари металл конструкциялар заводига, «Бинокор» масъулияти чекланган жамиятнинг ишлаб чиқариш майдонига, пишлоқ ишлаб чиқарувчи қўшма корхонага, тўқимачилик дастгоҳлари учун эҳтиёт қисмлар ишлаб чиқарадиган корхонага, «Ўзавтосаноат» томонидан ташкил қилинган Cooperation LAB тармоқлараро кооперация марказига ташриф буюрди. Cooperation LAB марказида саноат соҳаларида маҳаллийлаштиришни кенгайтириш масаласида йиғилиш ўтказилди.
Изоҳ (0)