Ўзбекистон Ички ишлар вазирлиги Норматив-ҳуқуқий ҳужжатлар лойиҳалари муҳокамаси порталига муҳокама учун қўйилган «Митинг, йиғилиш ва намойишлар тўғрисида»ги қонуни лойиҳаси юзасидан баёнот билан чиқди.
Баёнотда қайд этилишича, қонунни қабул қилишдан асосий мақсад фуқароларнинг ўз ижтимоий фаолликларини митинг, йиғилиш ва намойишлар кўринишида амалга оширишга қаратилган конституциявий ҳуқуқларини рўёбга чиқариш, шунингдек, уларнинг ушбу соҳадаги ҳуқуқий саводхонлигини оширишдан иборат.
ИИВ матбуот хизмати амалдаги қонунчилигида йиғилиш, митинг ва намойишлар тушунчалари, уларни ташкил этиш ва ўтказиш тартибини белгиловчи норматив-ҳуқуқий ҳужжат мавжуд эмаслигини таъкидлаб ўтган.
«Мазкур ҳуқуқий бўшлиқ ҳанузгача, Ўзбекистон Конституциясининг 33-моддасида кўрсатилган қоидаларни тўлиқ рўёбга чиқаришга имкон бермасдан келмоқда», — дейилади баёнотда.
Конституциянинг 33-моддаси: Фуқаролар ўз ижтимоий фаолликларини Ўзбекистон Республикаси қонунларига мувофиқ митинглар, йиғилишлар ва намойишлар шаклида амалга ошириш ҳуқуқига эгадирлар. Ҳокимият органлари фақат хавфсизлик нуқтаи назаридангина бундай тадбирлар ўтказилишини тўхтатиш ёки тақиқлаш ҳуқуқига эга.
Вазирлик қонуни лойиҳаси жамоатчилик муҳокамасига қўйилгандан сўнг, ижтимоий тармоқ фойдаланувчиларининг, ушбу қонунни қабул қилиш зарурати Беларусь ўтказилаётган оммавий норозилик намойишларидан сўнг вужудга келганлиги тўғрисидаги фикрларни рад этди. Эслатиб ўтамиз, митинглар тўғрисидаги қонуннинг биринчи лойиҳаси ўтган йил июнь ойида муҳокама учун тақдим этилган эди.
Изоҳ (0)