Ижтимоий тармоқларда «Самарқандда катта жанжал бўляпти. Ҳоким кўзингиз қаерда?» деб номланган видео тарқалди. Видеода Пастдарғом тумани «Ўрта Чархин» маҳалласи 4-уйда яшовчи фуқаролар омборхона ва уйлари «Азишах файзи» масъулияти чекланган жамияти томонидан ноқонуний тарзда бузилаётганлигидан шикоят қилган.
«Дарё» мухбири Фарҳод Норбўтаев ҳолат юзасидан журналистик суриштирув олиб борди.
«Ўрта Чархин» маҳалласидаги кўп қаватли уйда яшовчи фуқароларнинг маълум қилишича, улар бу ерда омборхона қуриб, қишлоқ хўжалиги маҳсулотлари ва бошқа нарсаларини сақлаб келади. Аҳолининг таъкидлашича, ҳудудда қурилган омборхона ва уйларнинг ҳеч қандай ҳужжати йўқ.
«Бу ерга уй қуриб, 15 йилдан буён учта хўжалик яшаб келамиз. Барча солиқларни, хусусан, коммунал тўловларини ҳам мунтазам тўлаганмиз, — дейди Тамара Норбулакова. — Уйга ҳужжат қилиш учун жуда кўп югурдим. Бир неча бор туман ҳокимлигига мурожаат қилдим. Бироқ қарор чиқара олмадим. Ҳатто Вазирлар Маҳкамасининг 2018 йил 21 июндаги 461-сонли «Фуқароларни ижтимоий қўллаб-қувватлаш бўйича қўшимча чора-тадбирлар ҳамда ўзбошимчалик билан қурилган турар жойларга нисбатан мулк ҳуқуқини эътироф этиш бўйича бир марталик умумдавлат акциясини ўтказиш тўғрисида»ги қарорига асосан ҳам ҳужжат қилиш учун югурдим. Аммо мен эгалик қилаётган ер бу қарорга тўғри келмаслигини айтишиб, қарор чиқариб беришмади».
Тамара Норбулакова билан суҳбат жараёнида уйга тегишли ҳужжатлар билан танишишни мақсад қилдик ва ҳужжатларини сўрадик. У қўлида барча зарур ҳужжатлари борлигини, аммо бизга ҳеч қандай ҳужжат кўрсатмаслигини, барча ҳужжатларни масъул ташкилотларга кўрсатишини маълум қилди. «Намуна» хусусий уй-жой мулкдорлари ширкати эса Тамара Норбулакова эгалик қилиб, уй қуриб олган ер бўйича ҳеч қандай қарор йўқлигини айтиб, бу ҳақдаги хатни кўрсатди.
Фуқаро Қобил Раҳматуллаев ҳам кўп қаватли уйда яшашини, «Намуна» хусусий уй-жой мулкдорлари ширкатига қарашли ерда уй қурганлигини маълум қилди. Қурилган уйига эгалик қилиш ҳуқуқини берувчи қарори бўлмаганлиги учун қарор чиқариш мақсадида бир неча бор туман ҳокимлигига мурожаат қилганини, туман ҳокимлиги бу ердан қурилган уй учун қарор чиқариб бўлмаслигини маълум қилганини айтди.
«Бу уйда қишлоқ хўжалиги маҳсулотларини сақлаймиз. Кўп қаватли уй ёзда иссиқлик қилади. Шунинг учун ёзда шу ерда тураман, — дейди Қобил Раҳматуллаев. — Қурилган уйга қарор чиқариш учун кўп ҳаракат қилдик, аммо бўлмади. Бугун эса биз қурган уйлар бузилиб, бу ерга янги кўп қаватли уй қурилмоқда».
Журналистик суриштирув давомида маълум бўлишича, Самарқанд вилоят уй-жой коммунал хизмат кўрсатиш бошқармаси Пастдарғом туман бўлими 2020 йил 10 апрель куни туман ҳокимлигига хат чиқариб, «Ўрта Чархин» маҳалласи ҳудудидаги «Намуна» хусусий уй-жой мулкдорлари ширкатига қарашли фойдаланилмайдиган 60 сотих ер майдонини туман ҳокимлиги захирасига ўтказилишини сўраган.
Мазкур хат ва Пастдарғом туман ер ажратиш масалалари билан доимий шуғулланувчи туман ҳокимлиги комиссиясининг 2020 йил 15 апрелдаги хулосаси асосида 2020 йил 2 май куни «Ўрта Чархин» маҳалласи ҳудудидаги «Намуна» хусусий уй-жой мулкдорлари ширкатига қарашли фойдаланмасдан бўш турган ер майдони туман ҳокимлиги захирасига ўтказилган.
«2020 йилнинг 13 июль куни ‘Электрон онлайн аукционларни ташкил этиш маркази’ давлат унитар корхонаси томонидан ўтказилган онлайн аукционда ушбу ҳудудга кўп қаватли уй қуриш мақсадида 10 миллиард сўм миқдорда инвестиция киритиш орқали ерни сотиб олдик. Лойиҳага кўра биз бу ерда учта беш қаватли уй қуришни режалаштирганмиз. Бунинг учун барча зарур ҳужжатларни қилиб, сўнг иш бошлаганмиз, — дейди «Азишах файзи» масъулияти чекланган жамияти раҳбари Азим Ҳамидов. — Бироқ қурилиш ишларини бошламоқчи бўлиб турганимизда бу ерда ноқонуний қурилиш қилиб олган фуқаролар бизга қаршилик қилишмоқда. Ваҳоланки юқорида айтганимдек, биз ерни аукциондан сотиб олганмиз».
«Азишах файзи» МЧЖ раҳбари Азим Ҳамидов Тамара Норбулакованинг яшаш шароити оғирлиги сабаб хонадони бузилиши эвазига янги қурилаётган уйдан имтиёзли тарзда икки хонали уй берилишини маълум қилиб, вақтинчалик яшаб туриши учун 2-3 та уй таклиф қилганлигини билдирди. Аммо Тамара Норбулаковага таклиф қилинган уйлар маъқул келмаган.
«Биз туман ҳокимлигига Тамара Норбулакованинг яшаш шароити оғирлигини ҳисобга олиб, ҳомийлик қилишса янги қурилаётган уйлардан беришимизни айтдик. Уйнинг бошланғич тўловини ҳомийлар тўлаб берса, қолганини кредит асосида тўлаб бориши мумкинлигини билдирдик. Бироқ улар бизнинг таклифимизни маъқулламади», — дейди Азим Ҳамидов.
Тамара Норбулакова эса янги уй учун нафақат бошланғич тўлови, балки кейинчалик кредит тўловларини амалга ошира олмаслигини айтди.
Ҳолат юзасидан «Ўрта Чархин» маҳалла раиси Маҳфуза Хўжанова ва маҳалла мутахассиси Гулчеҳра Раҳмонова билан ҳам суҳбатлашдик. Уларнинг таъкидлашича, фуқаролар ушбу ердан ноқонуний тарзда фойдаланиб келмоқда. Ҳатто фуқаро Қобил Раҳматуллаев ўзи эгаллаб олган ерга қарор чиқариш мақсадида ширкат раиси Салим Саттаровга пул берганлиги оқибатда жиноят иши очилиб, иши судда кўриб чиқилганлигини маълум қилди.
«Дарё» воқеалар ривожини кузатишда давом этади.
Изоҳ (0)