Қозоғистон соғлиқни сақлаш вазирлиги коронавирус инфекциясига чалиниб ундан тузалган болаларда оммавий равишда Кавасаки синдроми кузатилаётгани ҳақидаги хабарларни инкор этди. Вазирлик ахборотига кўра, мамлакатда фақат 14 нафар болада COVID-19’дан кейин Кавасаки синдроми кузатилган. Бу ҳақда «Интерфакс» хабар қилди.
«Болаларнинг Кавасаки синдромига оммавий равишда чалинаётгани ҳақидаги хабар ҳақиқатга тўғри келмайди», – дейилади Қозоғистон ССВ ахборот хизматининг ахборотида.
Вазирлик айни вақтда кўплаб мамлакатлар, жумладан, Қозоғистон коронавирус инфекциясининг енгил, белгисиз ўтадиган шакли билан касалланган болаларда кўп тизимли яллиғланиш синдроми (Кавасаки синдроми) касаллиги кузатилаётганини маълум қилган.
«Бироқ ушбу касаллик айрим болаларда кузатилмоқда ва коронавирус инфекциясига чалинган ҳамма болалар у билан, албатта, касалланади деб айтишга асос йўқ», – дейилади хабарда.
Қозоғистон ССВ тақдим этган расмий статистика бўйича 13 мартдан 19 августгача 2 357 нафар вояга етмаган болаларда COVID-19 коронавирус инфекциясига чалиниш ҳолатлари кузатилган.
«Кўп қатламли яллиғланиш синдроми уларнинг 14 нафарида кузатилган. Яъни касалланиш кўрсаткичи 0,6 фоиздан ҳам паст. Шундан беш нафар бола Нур-Султон шаҳрида яшайди, уларнинг уч нафари касалликдан тўлиқ тузалиб уйига кетган, Қарағанда, Акмолинск ва Оқтўбе вилоятларида икки нафардан, Олмаота, Туркистон ва Атирау вилоятларида бир нафардан бола ушбу синдром билан касалланган», – дейилган маълумотда.
ССВнинг қайд этишича, касалланган болаларнинг ҳаммаси етук тиббиёт мутахассислари назоратида бўлиб турибди. Уларнинг даволаниши учун махсус койкалар ажратилган, болаларга керакли дори воситалари ажратилган.
Аввал Қозоғистонда 2 миллион нафардан зиёд аҳолига 42 500 тенгедан ёрдам пули тарқатилгани, мамлакатда коронавирусга қарши вакцинанинг клиник босқичдан олдинги синови якунлангани ҳақида хабарлар берилган.
Изоҳ (0)