Хориж фуқаролари Миср ҳудудига кириши учун 2020 йил 1 сентябрдан бошлаб коронавирусни аниқлаш учун ПЗР-тестнинг «манфий» натижаси ҳақидаги маълумотни тақдим этиши ёки мамлакатда уни топшириши мажбурий деб белгилаб қўйилмоқда. Бу ҳақда Миср бош вазири Мустафо Мадбули маълум қилган, дея хабар берди Аhram Online.
Сайёҳларнинг мазкур тестни топширгани ҳақида маълумотнома топшириши лозимлиги тўғрисидаги қарор айрим хориж давлатларида касалланиш ҳолатлари яна кўпая бошлагани туфайли қабул қилинган.
«Биз мамлакат ҳудудига кириб келган ҳар бир инсоннинг соғлиғи учун, қолаверса мисрликлар саломатлиги учун жавобгармиз. Шу сабабли Мисрга келган ҳар қандай давлат фуқароси коронавирусни аниқлаш бўйича тестни топшириши зарур», – деган ҳукумат раҳбари.
Бу борадаги янги қарор ҳукуматнинг Миср ҳудудида шаҳардан шаҳарга ўтишда, жумладан пойтахт Қоҳирага келишда маҳаллий аҳоли вакилларидан ПЗР-тестнинг «манфий» чиққани ҳақидаги маълумотнома тақдим қилинганидан кейингина ҳаракатланишга рухсат берилиши ҳақидаги чорасидан кейин қабул қилинган.
Мисрда 1 июлдан бошлаб халқаро авиақатновларга рухсат берилган, март ойида ҳаво орқали қилинадиган йўловчи ва юк ташиш бўйича рейслар тўлиқ бекор қилинган эди.
Ҳозирда хорижлик сайёҳларнинг Мисрдаги коронавирус инфекцияси бўйича кўрсаткичи анча паст бўлган ҳудудлар Жанубий Синай, Қизил денгиз ва Матрухга киришига рухсат этилган.
Эслатиб ўтамиз, МДҲ давлатлари ҳам Миср билан авиақатновларни қайта тиклаган, хусусан Қозоғистон 17 августдан бошлаб БАА, Беларусь, Германия, Нидерландия, Миср, Украина ва Россия билан авиақатновларни йўлга қўйган.
Изоҳ (0)