2020 йилнинг биринчи ярим йиллигида Швецияда 51,4 минг нафар одам вафот этган. Бу ҳақда Швеция давлат статистика бошқармаси (СCБ) маълум қилди.
Идора берган маълумотга кўра, бу 1869 йилдан бери ҳали кузатилмаган салбий натижа. 1869 йилнинг дастлабки олти ойида Швецияда 54,4 минг киши вафот этган ва уларнинг ўлимига 1867 йилда бошланган очарчилик сабаб бўлганди.
2020 йилнинг биринчи ярим йиллигидаги ўлимлар сони мамлакатда 2015 – 2019 йиллар оралиғида қайд этилган ўлимларнинг ўртача олинган сонидан 4633 тага кўп. Статистика бошқармаси вафот этганлар сонининг бирданига кўпайганига аниқ сабаб кўрсатмаган, бироқ кўрсаткичнинг кескин ошиши коронавирус инфекцияси билан боғлиқлиги айтилмоқда.
Идоранинг аниқлик киритишича, COVID-19 коронавирус эпидемияси Швецияда 2020 йил февралида бошланган. СCБ маълумотлари бўйича март ойидан бошлаб одамлар ўлими кескин ошган ва апрель ўрталарига бориб бу борадаги вазият чўққисига кўтарилган, 10,5 минг нафар киши (уларнинг ўлими фақат коронавирус инфекцияси эмас, яна бошқа турли сабабларга кўра содир бўлган).
АҚШдаги Жонс Ҳопкинс университети статистикасига мувофиқ, Швецияда 2020 йил 20 август ҳолатига кўра 85,8 минг кишида коронавирус инфекцияси борлиги аниқланган ва 5,8 минг нафар бемор касаллик асоратлари оқибатида вафот этган. АҚШ университети маълумотлари бўйича Швецияда қўшни Дания ҳамда Норвегиядан фарқли равишда COVID-19 билан касалланганлар ва унинг оқибатида вафот этганлар кўрсаткичи анча юқори.
Швеция эпидемия вақтида ЕИга аъзо бошқа давлатлар тутган йўлдан бормаган, яъни ресторанлар, дўконлар ва мактабларни ёпмаган. Июнь бошида мамлакат бош эпидемиологи Андерс Тегнелл Швеция ҳукуматининг коронавирус инфекциясига қарши курашда танлаган йўли хато экани, лекин умумий олиб қараганда стратегия тўғри йўлдалигини билдирган.
Изоҳ (0)