Ўрта Ер денгизидаги Ливия соҳилларига яқин ҳудудда камида 45 нафар қочоқ сувга чўкиб ҳалок бўлди. Қочоқларга тўла катта қайиқнинг ҳалокати 2020 йилда денгизда кузатилган энг фожиали воқеалардан бирига айланди, деб ёзмоқда Le Point.
Хабарга кўра, қайиқнинг двигатели портлаган ва у Ливиянинг Зувара шаҳри яқинида сувга ғарқ бўлган. Маҳаллий балиқчилар томонидан қайиқдаги 37 нафар одам қутқариб қолинган. Асосан Сенегал, Мали, Чад ва Гана фуқаролари омон қолгани айтилмоқда.
БМТнинг қочоқлар масалалари бўйича агентлиги берган маълумот бўйича мазкур фожиа туфайли Ўрта Ер денгизи атрофидаги қурбонлар сони камида 302 нафарга етган. БМТ вакилларининг қайд этишича бу нисбий рақамлар ва ҳалок бўлганларнинг ҳақиқий сони расмий манбаларда келтирилмаган бўлиши ҳам мумкин.
Аввал июнь ойида Тунис қирғоқларига яқин жойда ичида муҳожирлар бўлган кема чўкиб кетган ва бунинг оқибатида камида 61 киши сувга чўкиб вафот этган. Қурбонлар орасида вояга етмаган бола ҳам бўлган.
2019 йил август ойида ҳам Ливия қирғоқларида муҳожирлар бўлган кема чўкиб кетган ва 40 га яқин одам ҳалок бўлганди.
Изоҳ (0)