Россияда коронавирусга қарши оммавий эмлаш 2020 йил октябрь ойидан бошланади, бунда Гамалея институти томонидан яратилган вакцинадан фойдаланилади. Бу ҳақда вакцинани яратиш ва тадқиқ қилиш ишларини молиялаштирувчи Россиянинг тўғридан-тўғри инвестициялар жамғармаси раҳбари Кирилл Дмитриев маълум қилди, деб хабар бермоқда Meduza.
Дмитриев халқаро журналистлар иштирок этган онлайн конференцияда чиқиш қилган. Жамғарма раҳбари 2020 йил октябрь ойигача тайёр бўладиган вакциналар сонини маълум қилмаган.
Эмлаш билан бир вақтда вакцинанинг клиник тадқиқотларининг учинчи фазаси ҳам олиб борилади. Конференцияда синовларда иштирок этадиган кўнгиллиларнинг сони биринчи марта эълон қилинди. Дмитриевнинг сўзларига кўра, кўнгиллиларнинг сони 40 минг кишини ташкил қилади.
Шунингдек, Дмитриевнинг аниқлик киритишича, учинчи фаза икки каррали рандомизацияланган синовлар стандартлари асосида ўтказилади, яъни кузатувларда иштирок этадиган на кўнгиллилар, на шифокорлар ким ҳақиқий вакцинани, ким плацебони қабул қилаётганини билмайди.
Россия вакцинасини яратган Денис Логунов аввалроқ Гамалея институти 2020 йил охирига бориб йилига 3-5 миллион доза вакцина ишлаб чиқариш қувватига эга бўлишини маълум қилганди. Дмитриевнинг маълум қилишича, энди ишлаб чиқаришга Россиянинг бошқа биотехнологик компаниялари — «Биннофарм», «Генериум» ва «Р-Фарм» қўшилган. Дмитриевнинг сўзларига кўра, дунёнинг турли мамлакатларидан бир миллиард дозага буюртма олинган. Дмитриев вакцина россиялик истеъмолчилар ва бошқа давлатлардаги истеъмолчилар ўртасида қандай тақсимланишига аниқлик киритмаган.
Россиянинг Гамалея институти томонидан яратилган коронавирусга қарши икки компонентли вакцинаси 11 август куни вақтинчалик рўйхатдан ўтиш гувоҳномасини олди. Вакцина тўлиқ самарадорлик тадқиқотини ўтказиш шарти билан рўйхатдан ўтказилган ва гувоҳнома 2021 йил 1 январга қадар амал қилади.
Вакцинанинг клиник синовлари учинчи фазасининг якунланишидан (ҳатто бошланишидан) олдин рўйхатдан ўтказилиши препаратни энди нафақат синовлардаги иштироки учун компенсация оладиган ва ножўя таъсирга қарши суғурта қилинадиган кўнгиллилар, балки 18 ёшдан 60 ёшгача бўлган оддий одамлар ҳам қабул қилиши мумкинлигини англатади.
Ишлаб чиқарувчиларнинг ваъдаларига қарамасдан, ҳалигача мазкур вакцина ҳақида илмий журналларда ҳеч қандай маълумот эълон қилинмаган. Вакцина ишлаб чиқарилиши ҳақида хабар бериш учун яратилган сайтда шу пайтга қадар ўтказилган қўшма фаза тадқиқотлари ҳақида ҳам маълумот берилмаган.
Эслатиб ўтамиз, Россиянинг фармацевтика компаниялари ва илмий-тадқиқот ташкилотларини бирлаштирган Клиник тадқиқотлар ташкилотлари ассоциацияси Гамалея номидаги Эпидемиология ва микробиология марказида ишлаб чиқилган вакцина етарлича синовдан ўтказилмагани учун уни рўйхатдан ўтказишни кечиктиришга чақирганди. Бунга жавобан Россиянинг Соғлиқни сақлашни назорат қилиш федерал хизмати («Росздравнадзор») ушбу вакцина билан бир неча юзлаб кўнгиллилар эмлангани ва уларда вакцинага нисбатан жиддий ножўя таъсирлар кузатилмаганини маълум қилган. Шунингдек, Россия Соғлиқни сақлаш вазирлигининг штатдан ташқари бош эпидемиологи Николай Брико COVID-19’га қарши вакцинани яратишда аденовирус асосида бир хил технология ишлатилганини, шунинг учун бу ҳолда у қайта кўриб чиқишга, кечиктиришга муҳтож эмаслигини билдирган.
Изоҳ (0)