Беларусда мухолифатнинг мувофиқлаштирувчи кенгаши тузилгани сабабли жиноят иши қўзгатилди. Бу ҳақда мамлакат бош прокурори Александр Конюк маълум қилди, деб ёзмоқда Meduza.
Иш Беларусь Жиноят кодексининг 361-моддасига (Беларусь миллий хавфсизлигига зарар етказишга қаратилган ҳаракатларга чақирувлар) асосан қўзғатилган. Модда беш йилгача озодликдан маҳрум қилиш жазосини кўзда тутади.
«Мувофиқлаштирувчи кенгашнинг тузилиши ва фаолияти давлат ҳокимиятини эгаллаб олишга, шунингдек, Беларусь миллий хавфсизлигига зарар етказишга қаратилган», — дея маълум қилган Конюк.
Мувофиқлаштирувчи кенгаш томонидан маълум қилинишича, тузилма Беларусь миллий хавфсизлигига таҳдид солмайди. Қўшимча қилинишича, жиноий ишга қарамасдан, кенгаш ўз ишини давом эттиради.
Бир неча кун аввал Александр Лукашенко мувофиқлаштирувчи кенгаш тузилишини ҳокимиятни эгаллашга уриниш деб баҳолаганди ва «муносиб чоралар» кўриши ҳақида огоҳлантирганди.
Мувофиқлаштирувчи кенгаш тузиш ташаббуси Александр Лукашенконинг сайловдаги асосий рақиби Светлана Тихановская томонидан илгари сурилган. Унинг ғоясига кўра, кенгаш Беларусда «ҳукуматни топширишни» таъминлаши керак.
Мувофиқлаштирувчи кенгаш 18 август куни тўлиқ ташкил қилинди. Унинг президиумига етти киши, жумладан, адабиёт йўналишида Нобел мукофотини қўлга киритган Светлана Алексейевич ва Беларуснинг собиқ маданият вазири Павель Латушко кирган.
Кенгаш ўз мақсади сифатида янги президентлик сайлови ва ҳукуматни топширишни белгилаб олган. Унинг аъзолари қайд этишича, улар Беларуснинг конституцион тузилиши ва ташқи сиёсат йўналишини ўзгартиришга уринмайди.
Эслатиб ўтамиз, Беларусь мухолифати Лукашенконинг такрорий президент сайловларида қатнашишига халал бермасликка ваъда берганди.
Аввалроқ Беларусь президентлигига номзод Светлана Тихановская Европа Кенгашига видеомурожаат билан чиқиб, Европа етакчиларидан Беларусдаги сайлов натижаларини тан олмасликни сўраганди. Шундан сўнг Европа Иттифоқи давлатлари раҳбарлари Беларусда бўлиб ўтган президентлик сайлови натижаларини тан олмаслиги маълум қилинди. Шунингдек, Евроиттифоқ Беларусь фуқароларига ёрдам бериш учун 53 миллион евро маблағ ажратади.
Бунга қадар Канада, Ирландия ва Буюк Британия Беларусдаги президентлик сайлови натижаларини тан олмаслигини маълум қилганди. АҚШ президенти Дональд Трамп Беларусда юз бераётган воқеаларга ўз муносабатини билдирганди.
Шунингдек, Еврокомиссия иттифоқ мамлакатларни Минскка қарши санкциялар қўллашга тайёр деб баҳолаётгани ҳақида хабар берилганди. БМТ бош котиби эса Беларусда сайловлардан кейин юзага келган можарони мулоқот орқали ҳал қилишга чақирди. Европа парламенти Лукашенкога persona non grata мақомини берди ва Москвадан Беларусь ишларига аралашмасликни сўраганди
Изоҳ (0)