Алексей Навалний оғир аҳволда жойлаштирилган Омск шаҳридаги 1-сонли тез тиббий ёрдам шифохонаси бош шифокори ўринбосари Анатолий Калиниченко сиёсатчининг аҳволи тўғрисида маълумот берди, деб хабар қилади Meduza.
«Беморнинг аҳволи барқарор, интенсив терапия давом этмоқда. Касаллик ташхиси борасида олдинга силжидик. Қон, бош мия, бошқа орган ва тизимлар ишига оид ўнлаб натижаларни олинди. Даволаш ишлари давом этмоқда, яхшиямки бизда бу каби беморларни даволашга ихтисослашган марказ бор. Шифокорлар нафақат барча имкониятларни ишга солмоқда, балки ростдан ҳам унинг ҳаётини сақлаб қолиш билан шуғулланяпти», — дейди Калиниченко.
Шу билан бирга, Калиниченко Навалнийга қўйилган ташхис ёки унинг таҳлил натижалари тўғрисида маълумот беришдан бош тортган.
Аввалроқ россиялик сиёсатчи Алексей Навалнийнинг аҳволи Томск—Москва йўналиши бўйича учаётган рейс вақтида оғирлашиб қолгани ва самолёт фавқулодда Омскка қўнгани тўғрисида хабар берилганди.
Сиёсатчининг матбуот котиби Кира Ярмишнинг маълум қилишича, Навалний заҳарланган бўлиши мумкин.
Изоҳ (0)