Беларусь мухолифати 5 ноябрь, Александр Лукашенконинг бешинчи президентлик муддати тугаганидан сўнг такрорий президентлик сайловларини ўтказишни талаб қилади. Бу ҳақда 20 август куни Беларусь мухолифатининг мувофиқлаштирувчи кенгаши аъзоси Мария Колесникова «Интерфакс»га маълум қилган.
Унинг таъкидлашича, мухолифат Александр Лукашенконинг такрорий сайловларда иштирок этишида ҳеч қандай тўсиқ кўрмаяпти. «Биз унинг қўпол сохталаштириш билан бўлса-да, административ ресурсларга эга бўлиб туриб ютқазганини кўряпмиз. Беларуснинг ҳар бир фуқароси сайловда иштирок этиш ҳуқуқига эгалигидан келиб чиқиб бунда ҳеч қандай тўсиқлар бўлмаслиги керак», — деган Колесникова, лекин мухолифат Лукашенконинг бунга рози бўлишига ишонмаётганини таъкидлаган.
Колесникованинг фикрича, сайловлар олдидан Марказий сайлов комиссиясининг таркибини тўлиқ янгилаш, шу жумладан, комиссия раҳбарини ўзгартириш, шунингдек, халқаро кузатувчиларни сайловга жалб қилиш керак.
Эслатиб ўтамиз, Беларусь мухолифатининг мувофиқлаштирувчи кенгаши Светлана Тихановская — Александр Лукашенконинг президент сайловларидаги рақиби таклифи билан тузилган. У Беларусь Марказий сайлов комиссиясининг дастлабки ҳисоб-китобларига кўра, президентлик сайловларида 10,09 фоиз овоз олган. Сайловлардан кейин мамлакатда бошланган норозилик намойишлари иштирокчилари Тихановская сайловда ғалаба қозонган деб ҳисобламоқда.
Аввалроқ Европа парламенти Лукашенкога persona non grata мақомини бергани, Канада ва Ирландия Беларусдаги президентлик сайловида Александр Лукашенко ғалаба қозонганини тан олишдан бош тортгани хабар қилинганди.
Кейинчалик Беларусь президентлигига номзод Светлана Тихановская Европа Кенгашига видеомурожаат билан чиқиб, Европа етакчиларидан Беларусдаги сайлов натижаларини тан олмасликни сўраган, ўз навбатида Европа Иттифоқи давлатлари раҳбарлари Беларусда бўлиб ўтган президентлик сайлови натижаларини тан олмаган.
Изоҳ (0)